Vehíkulo ku tabata wòrdu usa pa transportá prezu sendé na kandela

Den e kura unda tabata warda vehíkulonan konfiská na Arrarat

339
Willemstad— Polis ta investigando un  kaso di insendio ku a tuma lugá den e kura unda ántes tabata warda vehíkulo konfiská esta  Kura di Raspa.

Ayera den oranan di atardi Bomberonan stashoná na Steenrijk i tambe Mundo Nobo a keda dirigí ku urgensia pa Seru di Arrarat na e sitio unda ántes tabata warda vehíkulonan konfiská pa Polis. Ta trata di e Kura di Raspa manera esaki tabata wòrdu yama. Einan deskonosínan a sende no ménos ku kuater vehíkulo na kandela. Ta trata di vehíkulonan ku ántes tabata wòrdu usa pa transportá Prezu sea di prizon pa stadhuis i vise versá i tambe di e wardanan di Polis pa stadhuis.

A saka e vehíkulonan aki for di funshon debí ku tabatin di nan no tabatin erko den dje kual tabata pone ku e prezunan tabata reklamá ku tabata hasi sumamente kalor na e parti patras den e vehíkulo. Tambe tabatin di nan ku tabatin un desperfekto chikí pa kual a pone nan riba e tereno na Arrarat. Polis ta investigando awor ken ta esnan responsabel pa a sende e vehíkulonan aki na kandela.