Organisashon Shuatanari a selebrá 40 aña

127
E ekipo di Shuatanari.

WILLEMSTAD—Mañan djadumingu dia 17 mei 2019, ta fecha ku e organisashon lokal di vòlibòl, Shuatanari, ta selebrá nan di 40 aña di eksistensia.

Dia  19 di mei 1979,  sr. Henry Delfina i sr. Rignald Bodok a funda O.D. Shuatanari.

Shuatanari a nase komo un ekipo hubenil i a partisipá mesora den e promé kampionato hubenil di vòlibòl na aña 1979.

 

Kuna di e organisashon ta e bario di Buena Vista

Despues di un permanensia di 4 aña den liga hubenil, Shuatanari ta pasa pa divishon superior den kategoria klase A.

 

Shuatanari ta konstruí riba un fundeshi sólido

O.D. Shuatanari semper a duna prioridat i preferensia riba su kategorianan hubenil. For di inisio di e kampionato hubenil di aña 1979 te ku presente e organisashon a partisipá na tur e kampionatonan hubenil. Meta di e partisipashon na e aktividatnan hubenil ta pa kontribuí na desaroyo di e hóben, un mihó persona i tambe krea un bon atleta.

Na aña 2016 e kuerpo tékniko a haña refuerso di Durenne Rosalia i Dutly Damas den e parti hubenil, den kua Desiree Sirvania ya kaba tabata hasiendo un tremendo trabou. For di aña 2016 Shuatanari tin su sekshon maskulino tambe. Aktualmente O.D. Shuatanari ta reklutá su miembronan for di diferente bario di Kòrsou: Buena Vista, Dominguito, Seru grandi i Charo.

 

Historia impreshonante

O.D. Shuatanari/Lab de Med tin un historial di título. Ku 15 título di kampeon di Kòrsou den nan poder, ta hasi nan e ekipo femenino mas eksitoso den e deporte di vòlibòl di Kòrsou.

For di 1991 te ku aña 2019, ta únikamente un biaha O.D. Shuatanari no a partisipá den un final di vòlibòl di Kòrsou.

 

Logronan di Shuatanari

Den e periodo 2014 pa 2018, Shuatanari su kategorianan U-18, U-21 i klase-A a kosechá hopi éksito. Esaki ta demonstrá klaramente kon fuerte e parti hubenil ta. Den e lapso di tempu aki U-18 ta kampeonisá 2 biaha, U-21 tin tres título siguí.

Miéntras tantu den kategoria klase-A, Shuatanari ta kampeon for di 2015. Den e kategoria máksimo, ku ta klase superior, Shuatanari ta supkampeon di Kòrsou den e periodo ariba menshoná.