Watakeli ta reakshoná despues di tabata atras 2-0 pa gana i empatá e seri final

81
Akshon den di 2 wega entre Watakeli i Xaverianen.
WILLEMSTAD—Despues di tabata atras 2-0 kontra Xaverianen, e ekipo di Watakeli ta reakshoná pa gana 3 sèt sigui i asina empatá e seri final na un triunfo pa banda. Ta trata aki di e seri mihó di 5 wega den vòlibòl maskulino superior.

Ayera tabata den sala Errol Rooi, ku e 2 ekiponan ariba menshoná a topa den e di 2 wega di e seri finalisimo.

Xaverianen ta kue bentaha di 2-0, despues di gana e promé sètnan ku skor di 29-27 i 25-22. Ámbos sèt tabata bon bringá. Den di tres sèt e motor di Watakeli a start, ora nan gana ku skor di 25-20, pa seguidamente gana sèt 4, 25-18 i asina fòrsa e sèt desisivo.

Den e sèt final Watakeli a sali kue un bon bentaha i a mantené esaki te final i asina gana ku skor di 15-9, pa empatá e seri, den un wega sumamente emoshonante, ku a keda dirigí pa Edsel Comeninsia, kende tabata asistí pa Rodi Wilson.

E kampionato ta kontinuá djarason awó ku e di 2 wega di e semi final femenino entre Stakamahachi i Shuatanari. E seri maskulino, lo sigui djadumingu próksimo.