Landaeta i Kastaneer ku gol pa Vesta gana Jong Holland

218
Akshon den wega entre Vesta i Jong Holland.
WILLEMSTAD—E ekipo di bario di Sta Maria i bisindario, Vesta, dirigí pa Henry Caldera a logra nan promé 3 puntonan di Kaya 6 ayera. Esaki ora ku nan a derotá e ekipo trikolor di Jong Holland, ku skor di 2-0.

Tabata wega ku a konosé ámbos gol for di den e parti inisial di e partido, miéntras ku e ekipo ganadó a finalisá partido ku 2 hungadó ménos. Un ke otro despues ku Jean Carlos Arion, na di 74 minüt i Carlos Koeiman na di 90 minüt, a risibí kada unu nan di 2 karchi hel, ku a bira nan ekspulshon.

Miéntras tantu tabata Jose Landaeta ku ta habri anotashon na di 9 minüt di e enkuentro, dunando Vesta bentaha, ku e hóben Sidney Kastaneer a oumentá, despues di un tremendo hugada, unda e la a anotá un bunita gol pa oumentá e bentaha i asina a seya e triunfo, riba e ekipo dirigí pa Lennox Mauris.