Sospechoso a dal su pareha na estado algun skòp den su barika

3955
WILLEMSTAD,— Korte a trata un kaso basta serio unda un sospechoso mester tabata den poseshon arma kandela miéntras tambe el a maltratá su pareha i menas’é. Ta trata di un venezolano ku a maltratá su pareha ku ta na estado.

Tabata 3 di novèmber aña pasá ku e homber Jose Urdaneta lo mester a maltratá su pareha despues ku nan tabatin un diferensia di opinion. Esaki despues ku e dama a lanta e sospechoso pa bai hib’é trabou, unda e hòmber no a lanta. Tabata aki ku e dama a bai kue su telefòn pa asina e por yama un otro persona pa bai hib’é trabou ku e sospechoso a rabia.

Jose kende ta ilegal na Kòrsou lo mester a lanta for di kama riba e dia en kuestion, unda el a dal e  víktima un moketa miéntras tambe el a dal e víktima ku un skòp den su barika. E dama na su turno a puntra e sospechoso ku ta kèns e ta mirando ku e sa muchu bon ku e  víktima tabata na estado. Durante e kaso a bin dilanti ku e hòmber lo tabata keda ilegalmente riba nos pais i ku e tabatin su trabou aki na Kòrsou.

E dama a bisa ku e sospechoso a asta primi su kara kontra di un kusinchi pa trata na stek, unda e sospechoso a bisé na vários okashon, ku e mester stek.  Tabata despues ku e dama  a haña un chèns pa e kore bai, ku el a kore bai i bai hasi denunsia kontra di e hòmber Urdaneta. A bai realisá entrada hudisial unda a logra detené e sospechoso, miéntras tambe a bin haña un arma di kandela riba e dia en kuestion.

Segun e sospechoso ku ya pa 2 siman nan tin problema ku otro, despues ku e dama a bisé ku e ta na  estado, unda tambe e dama lo mester a bisé ku e ta bai duna e  yu fam di otro tata. Segun e sospechoso ku e dama tabatin 6 siman di embaraso na momentu ku e echo a tuma lugá. El a ninga di a menasá e dama, miéntras tambe el a bisa ku e arma di kandela no ta di dje.

El a splika ku kaminda nan tabata biba e tabata hür un kamber i ku mas persona tabatin akseso na e bibienda, miéntras e la bisa ku un di e persona nan ku ta biba na e kas por tabata den poseshon di e arma i buta esaki den su kamber sin e sa. Segun e sospechoso ku e dama no kier keda kuné mas i ku pa e motibu aki e la plania e kaso aki kontra di dje, pa asina e por skapa di dje.

Segun Urdaneta ku no ta promé biaha ku e dama ta hasi e tipo di kosnan aki, mirando ku ya den pasado el a yega di yama polis pa un frei ku e tabatin ku ta ilegal na Kòrsou. E sospechoso a bisa ku e tabata kansá i e dama kue telefòn i bèl un hòmber miéntras el a subi e bos na moda ku Urdaneta por skuch’é ta papia ku un hòmber.

Urdaneta a bin ku e  dama lo kier  hasié yalurs ku su aktonan. Fiskal a pidi un kastigu di 24 luna di prizòn pa e sospechoso, unda wes a baha esaki. Wes a kastigá Jose na 12 luna di prizòn pa poseshon arma kandela, menasa i tambe  tambe maltrato kontra di e dama. Tambe a but’é na altura ku e tin 2 siman pa apelá su sentensia si e no ta di akuerdo ku esaki