Problema entre bisiña ta terminá den tiramentu

Víktima ta haña herida di bala den pechu

5120
Yegada na hospital ku e víktima.
Polis tumando informashon den bario di loke a pasa.
Willemstad— Polis mester a bai Noord Zapateer pa ta mas eksakto Kaya Ibi Schoop pa un kaso di tiramentu di kual un persona mester a sufri herida di bala na altura di su pechu robes.

Ayera den oranan di atardi a pidi asistensia di Polis i tambe personal di ambulans pa presentá ku urgensia den Kaya Ibi Schoop situá den e bario di Noord Zapateer pa un hòmber herida. Polis ku a yega mesora na e sitio a bin topa ku un hòmber kual tabatin herida di bala na su pechu robes nèt bou di su kurason ku tabata sangra bastante.

E sitio unda e tiramentu a tuma lugá.

Mesora a kuminsá hasi e trámitenan pa asina por a transportá e víktima Poli pa e haña tratamentu médiko. A bin resultá ku tabatin un problema entre di dos bisiña ku a bin eskala. Dado momento a surgi un forsageo na unda e sospechoso mester a saka un arma di kandela i a hasi uso di esaki tirando riba e víktima i a herid’é. Den un estado basta stabil tòg e víktima a keda transportá pa Poli na unda e la keda interná. Mesora a kuminsá ku un búskeda pa e sospechoso ku despues di a tira riba e víktima a bandoná e sitio. E kaso di intento di asesinato i tambe uso di arma di kandela ta den investigashon.