Rekompensa pa informashon tokante kaso di asesinato na Veneto

Buskando e sospechoso kabei rasta

225
Willemstad— Polis ta yama komunidat danki pa e aporte risibí te na e momentonan akí, riba e kaso aki bou menshoná. Nos no a risibí e tep di oro ainda. E investigashon ta kontinuando. E sospechoso lo mester ta un hòmber ku kabei rasta.

“Komunikado di prensa 179/2019” Polis ke rekordá boso ku relashoná ku e kaso di asesinato ku a tuma lugá djaluna dia promé di yanüari 2018, alrededor di 00.40’or, riba e lugá di stashoná outo di ántes “Veneto Casino Beach Resort”, situá riba Pater Eeuwensweg, ta pidiendo yudansa di komunidat.

Riba e dia en kestion e hòmber Tayler Zuhayr de Lima, nasé na Kòrsou dia promé di yanüari 1998 a bin pèrdè su bida, debí na tirunan ku el a risibí for di arma di kandela. (Komunikado di prensa 003/2018).

Polis ta hasiendo lo maksimo pa por yega na solushon di e kaso. E rekompensa di dies mil florin antiano ku Ministerio Públiko a pone disponibel pa esun ku por duna e tep ku por hiba na klaridat i solushon di e kaso di asesinato aki ta ketu bai na vigor. Abo ku por a tende, mira òf sa di kualke informashon, pasa esaki pa polis.”

Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.