Grupo di Lima ta intensifiká preshon kontra régimen di Nicolas Maduro

63
E Grupo di Lima ta haña ku e situashon venezolano ta un rísiko pa pas di Latinoamérika.

GUATEMALA – E grupo di Lima a akordá na e Ciudad di Guatemala pa intensifiká e preshon internashonal kontra e régimen diktatorial i ilegítimo di Nicolas Maduro pa asina buska un solushon pasífiko i dialogá pa ku e krísis di Venezuela, ku ta un menasa pa pas di e region.

Despues di e reunion aki, a lesa tambe un deklarashon den kua a bolbe denunsiá ku Maduro i su régimen ta e úniko responsabelnan di e krísis humanitario ku kada bes ta mas i mas grave aya na Venezuela i a bolbe indiká ku su permanensia na poder ta un menasa pa pas i seguridat di Latinoamérika.

Pa e mesun motibu aki un total di 12 pais, Argentina, Brasil, Canada, Chile, Colombia, Costa Rica, Guatemala, Honduras, Panama, Paraguay, Perú i Venezuela, a insta e komunidat internashonal pa tuma akshon pa ku e kresementu i involukramentu di e régimen di Maduro den diferente formanan di korupshon, narkotráfiko i delinkuensia organisá.

Den e enkuentro, kua a tuma lugá ku porta será, tabatin intervenshon via di video konferensia di e Parlamento di Venezuela, Juan Guaidó, kende a eksponé e miembronan di e Grupo di Lima pa ku e ideanan ku e tin pa restourashon di demokrasia.

Venezuela ta biba den un pik di tenshon polítiko for di luna di yanüari último, na momentu ku Maduro a huramentá di nobo komo mandato pa seis aña, despues di a gana elekshonnan ku a keda tachá di froudulento pa oposishon. Komo respuesta na esaki, Guaidó mesora a outoproklamá su mes komo presidente interino, miéntras e poblashon ta sigui sufri di karensia di produktonan básiko i sumamente importante. Guaidó ta keda sostené pa mas di 55 pais pa ku su situashon, inkluyendo i prinsipalmente Estádos Unídos.