Venezuela ta responsabilisá Estádos Unídos di su problemanan sanitario

63
Segun e hòmber tur e situashon di krísis ta danki na medidanan estadounidense kontra Venezuela.

CARACAS – E embahador di Venezuela na Madrid, Mario Isea, a responsabilisá e blokeo finansiero estadounidense di e problemanan di su pais, manera e paralisashon di programa pa enfermonan ku tin mester di un transplante debí na falta di rekursonan públiko.

Esaki a sigui indiká ku un gran kantidat di pashènt ta afektá pa e echo aki i indiká ku algun ta interná na Venezuela, sperando e oportunidat di biaha pa Italia i otronan ku no por a operá ya a fayesé.

E mortonan aki a tuma lugá debí na e blokeo di e potensia nuklear, militar i finansiero di parti e pais norteamerikano, e hòmber a indiká den oranan di ayera.

Esaki a sigui bisa ku e ta hasi un yamada na Union Oropeo, un yamada na Spaña, pa mas aya di simplemente plania pero tambe implementá sanshonnan for di Oropa pa asina Estádos Unídos por pone un fin na su medidanan.

Isea a sigui sigurá ku e gobièrnu venezolano bolivariano a hasi un gran esfuerso den defensa di e derechinan humano ku polítika konkreto pa garantisá e bibienda, edukashon públiko gratuito i bida generalmente.

E embahador, kende a detayá un seri di programanan sanitario, a splika ku for di aña 2010 a impulsá e programa di transplante di venezolanonan pa Italia pa medio di Petrolio di Venezuela i su filial na Estádos Unídos, di kua mas ku 500 pashènt ta benefisiá.

Esaki a sigui indiká ku awor e filial petrolero ta keda ‘regalá’ na e gobièrnu norteamerikano, segun Isea, kulpando e presidente ku a outoproklamá su mes Juan Guaidó.

For di aña 2018, Isea mes a rekonosé, ku e konvenio di transplante tabatin problemanan. El a indiká ku a paga 1.500 mion di euro pa e esaki via di Novo Banko di Portugal, pero esaki a retené e sèn pa kousa di un blokeo apliká pa Estádos Unídos, ku a inkluí transakshonnan di Venezuela ku a keda kalifiká komo sospechoso i di ta relashoná ku korupshon, narkotráfiko òf terorismo.

Mas aleu a indiká ku ta un gran esfuerso ta keda hasí pa asina e 29 pashèntnan infantil ku ta wardando e tratamentu aki, por risibié i inkluso a pensa di hasi esaki na Oslo, pa kua a kuminsá ku diálogo pa por pone fin na e sanshonnan.

Segun e hòmber mes a indiká, tin un total di 5.470 mion di dòler di Venezuela blòkia na bankonan internashonal pa kumpra alimento, medisina, materialnan prima i produktonan pa industria.

Segun Nashonnan Uní, serka di 3,7 mion di venezolano a sali for di nan pais den e último añanan pa falta di e krísis polítiko i ekonómiko ku ta afektá e pais.

Inkluso e siman aki Banko Sentral di Venezuela a revelá ku e produkto interior brutu a kai ku un 22.5 porshento den e terser trimèster di aña 2018.