8 luna di prizòn pa poseshon mariwana i arma kandela

309
El a keda kondená pa poseshon arma i droga.
WILLEMSTAD,— Curtbert Theodora tabata dilanti wes ayera pa un kaso unda e mester tabata den poseshon arma kandela i tambe 212 gram di mariwana, despues ku a realisá entrada hudisial na e bibienda unda e ta biba.

Tabata 12 di febrüari último ku polisnan a bai realisá entrada hudisial na kas di e sospechoso, unda a bin haña un arma di kandela i tambe 212 gram di mariwana den kamber di Theodora. Polisnan a sigui hasi mas investigashon unda a bin haña un telefon ku no ta pertenesé na niun hende den e kas ei.

Ta trata aki di un telefon ku lo mester a keda hòrtá durante un atrako ku tabatin, kual na e okashon aki a bin Sali afó ku ta ruman di Curtbert, lo mester tabata uza e telefon aki. Segun e sospechoso ku esaki ta kuadra esta ku e telefon no ta di dje pero di su ruman chikí. El a splika ku su ruman lo mester a kumpra e telefon serka un persona ku ta biba den serkania di nan kas.

Pa loke ta trata e arma kandela ku a keda konfiská e sospechoso a atmití primeramente ku e arma di kandela ku a haña den e bibienda ta pertenesé na dje. El a splika ku e droga tambe ku a haña riba e dia en kuestion ta di dje i ku su mama i tambe ruman no tin nada di aber ku loke a keda konfiská. Tabata durante su deklarashon na wes komisario ku e sospechoso a disidí ku e ta kambia deklarashon. El a bisa na wes komisario ku e arma no ta di dje i ku ya for di ora el a sali for di prizòn na desèmber 2018 el a mira su ruman ku e arma kandela.

Tambe el a bisa wes ku e droga ta pertenesé na su ruman. Segun su deklarashon ku e la trata na skonde kos pa su ruman i tuma tur kos riba dje pa evitá ku nan mama lo zundra su ruman chikí. Segun e hòmber Curtbert ku awor si el a disidí ku e no ta bai hasi e kos aki mas i ku su ruman chikí mes tin ku para responsabel pa su aktonan.

Mas aleu el a bisa ku e no ta haña e reshèrshinan enkargá ku e kaso aki a investigá e kaso bin, paso si a hasi esaki manera mester ta, lo a nota ku e no ta e doño di e kosnan ilegal ku a konfiská. Loke sigur a hala atenshon den e kaso ta e echo ku mama di e sospechoso a bisa ku e arma ta di dje. Segun mama di e sospechoso, ku ruman chikí di Curtbert lo no hasi algu asina i no ta kapas. Fiskal mr. Hato-Willems a bisa ku Curtbert ta kulpabel di e echo, unda el a pidi un kastigu di 24 luna pa e akusashonnan ku tabatin den su kontra.

Wes mr. Edelenbos kende tabata e wes den e kaso a bisa ku e no ta di akuerdo ku e ponensia di fiskal, miéntras tambe el a bisa ku e ta deklará e sospechoso liber di poseshon telefon hòrtá. El a kastigá Curtbert na 11 luna di prizòn di kual 3 ta kondishonal ku 3 aña prueba, pa poseshon arma kandela i droga.