Ministerio Públiko ta tratando na kaba abuzu kontra ‘tragomeisjes’

147
WILLEMSTAD,— Durante rekisitorio di fiskal mr. de Groot el a trese dilanti ku ya pa algun tempu nan ta trahando pa para abuzu kontra di tragomeisjes aki na Kòrsou. El a bisa ku ta siguiendo e kasonan hopi di aserka pa evitá abuzu kontra di e dama nan.

Esaki sigur a hala atenshon durante e kaso unda e fiskal a bisa ku yega ora pa kuminsá baha ku man duru riba e sospechosonan, ku ta involukrá den e tipo di kasonan manera esaki. Tambe el a trese dilanti ku e kaso La Tasca no ta promé ku a bini dilanti wes i ku ya den pasado a doño di e negoshi Bandera Grill lo e konosé sentensia pa su aktonan i tambe algun polis ku tabata involukrá.

Mas aleu el a bisa ku e kaso La Tasca lo no ta último mirando ku ta investigando pa sa si tin mas di e kasonan manera esaki, pa asina por persiguí esnan responsabel pa e abuzu. E fiskal a splika ku doñonan di e negoshinan ku ta uza e dama nan komo trahadó tin hopi ganashi for di e negoshi, ku no ta operá di un forma legal.

Mr. de Groot a trese dilanti ku obligá e dama nan traha mas ku 8 ora miéntras tabata paga nan solamente NAFL 2,50 pa ora. E dama nan tabata kobra entre 125 florin pa 150 florin pa siman, miéntras tambe tabatin ganashi pa si e persona nan sali ku e dama for di e bar. E fiskal a trese dilanti ku mester paga 200 florin pa bai ku e dama for di e negoshi. Ministerio Públiko a bisa ku ta un abusu esaki ta, mirando ku ta abuzá di e dama nan pa motibu ku nan ta yega nos pais den nesesidat.

Ministerio Públiko representá pa mr. de Groot a trese dilanti ku e dama nan tabata víktima di e abuzu, mirando ku nan a bin Kòrsou ku e meta pa traha pa kuida nan famia nan ku ta den situashon hopi serio na Venezuela. Ta bin ku e dama nan Kòrsou, miéntras ya ora nan a yega Kòrsou nan tin un debe di 1.500 florin, na gastu nan di biahe i ta pone preshon pa nan likidá esaki mas lihé posibel.

Otro parti di e abuzu ku fiskal a trese dilanti ta e echo ku e dama nan mester a traha mas ku 8 ora pa dia, miéntras si nan yega lat òf keda sin presentá nan lo haña but. Tambe nan lo haña but ora nan uza telefòn i kome durante orario di trabou. Ministerio Públiko a bisa ku lo bai sigui e kasonan aki mas aserka mirando ku ta hasiendo mal uzo di poder, mirando ku e dama nan tin nesesidat.

Ounke e hotèl kaminda nan mester a keda tabata sushi i no tabatin privasidat, tabata obligá nan keda den esaki. Ta trata aki di hotèl Carlos segun Ministerio Públiko ku ta situá den serkania di La Tasca. Segun dama nan ku tabata keda den e hotèl, nan tin molèster di e sushedat i tambe kakalaka.