OM ta konsiderá trato kontra ‘Tragomeisjes’ igual na katibu moderno

149
WILLEMSTAD,—- Fiskal mr. de Groot ta konsiderá e sistema kon ta trata e dama nan den nesesidat aki na Kòrsou igual na katibu moderno, mirando ku ta abuzá di e situashon i e poder ku nan tin.

Durante e rekisitorio di Ministerio Públiko, por a nota ku tabata kobra e klientenan 200 florin, pa sali ku e dama for di e bar. Segun fiskal ku e damanan mester a buta nan kurpa disponibel i ofresé klientenan pa tene relashon. Pa esaki tabata buta e hotèl di e doño di La Tasca disponibel.

Ministerio Públiko a trese dilanti ku tur dama ku tabata den e negoshi La Tasca a deklará, ku nan mester a pone nan kurpa disponibel i ku nan tabata sa tur regla pa ku esaki. Pa hasi esaki mester a pasa serka e dama enkargá ku e bar na e momentu ei, ku ta sea Nina Koense òf Yolimar Hurtado. Segun fiskal ku ta trata aki di prostitushon i ku esaki ta kontra di lei.

Segun OM ku Nina Koense tabatin e ròl di mas importante despues di e doño mes mes kende ta Micheal Koense. E sospechoso enkargá ku e biahe pa Kòrsou tabata konosí bou di e nòmber ‘La Negra’ pa e víktimanan. Ta trata aki di e dama Yolimar de Hurtado, ku a skucha demanda di ménos kastigu ku tur otro sospechoso den e kaso.

Segun fiskal e tin ku sinta 1 aña di prizòn, pa motibu ku e tabata trese e dama nan Kòrsou pa e trabou i tambe ta kómplise di tur e aktonan aki. E dama ya tabatin algun aña ta traha pa e negoshi i a bisa di tabata gana máksimo 175 florin pa siman. Algun testigu a bisa ku nan tabatin miedu di Yolimar mirando ku e sospechoso a menasá nan den pasado.

E dama sospechoso lo mester a bisa algun di e víktimanan ku ta mata nan si nan bai polis. E tabata asta bisa nan ku nan mester keda traha na e negoshi i ku esaki ta kumbiní nan, mirando ku e víktimanan ta haña plaka pa sòru pa famianan. Yolimar tabata e man drechi di Nina Koense segun e víktimanan i tabata haña òrdu pa regla asuntunan di e damanan.

Ministerio Públiko ta bai sigui vigilá situashonnan manera esaki aki na Kòrsou, segun fiskal de Groot.