Telefòn konfiská a kontestá tur pregunta ku fiskal i wes tabatin pa akusado

337
Akusado ku a skucha kastigu pa arma i droga.
WILLEMSTAD,—- Silvien Yeung kende ayera a keda kondená na 7 aña di prizòn a hasi uzo di derechi keda ketu riba tur e pregunta nan ku a bin den su direkshon durante preparashon pa tratamentu di e kaso den kontenido, pero su telefòn ku a keda konfiská si a kontestá tur e pregunta nan ku wes i fiskal tabatin pe.

Esaki despues ku el a keda deportá pa Kòrsou, despues ku a gar’é ku arma kandela ilegal i ya tabata busk’é pa e droganan i armanan. Mesora despues ku a konfiská e droganan el a hui for di nos pais, unda mesora a pone un nota kòrá na Interpol pa sa su paradero, pero no a logra detené te na momentu ku e pais mes a sak’é for di nan teritorio.

Loke si ta remarkabel ta e echo ku e akusado a ninga te final ku e sa algu di e telefòn ku a konfiská pero loke nan a haña den e telefòn, a kontestá tur pregunta ku tabatin pa e akusado ku el a keda sin kontestá. Esaki despues ku na vários okashon fiskal i tambe wes a hasi pregunta na e akusado, unda el a hasi uzo di derechi keda ketu i no a kontestá.

A haña un kombersashon ku sigur tabata kardinal pa e pregunta, ku si e telefòn ta pertenesé na Silvien si òf no. Tabata durante investigashon di e kaso ku a bin nota ku tabatin algun felisitashon pa e doño di e telefòn. A bin nota ku tur e felisitashon nan tabata riba e fecha natal di e akusado, esta ku e telefòn mes a kontestá e pregunta ku tabatin pe

El a keda para ariba ku e no sa nada di e telefòn i ku esaki no ta di dje, despues ku a bin haña felisitashon di 3 di mart di aña 2016. Den e kaso aki asta un primu di e akusado mester a keda involukrá, unda a bin nota ku e pikòp tabata riba nòmber di primu di e akusado. Yeung a ninga di tabata kore e pikòp Mitsubishi L200, unda durante entrada hudisial en konekshon ku e kaso riba e mesun fecha di detenshon di e otro akusadonan, esta 13 di sèptèmber 2016, a bin yabi di reserva di e pikòp riba un kashi chikí banda di su kama.

Esaki tambe sigur tabata kardinal pa e pregunta ku si e tabata manehá e pikòp en bèrdat òf no. Primu di e akusado a bisa ku ya pa un siman Yeung tabatin e pikòp ei ta kore, miéntras di otro banda e akusado ta bisa ku e no tabata den poseshon esaki. E deklarashon di su primu i tambe e yabi reserva ku a haña den e kamber unda e tabata drumi a kontestá e pregunta di wes i fiskal.

Riba e telefòn a bin haña kombersashon unda ta papia di kargamentu nan di droga i tambe arma kandela. A asta papia di lote nan ku a yega Kòrsou i Yeung tabata disponé di foto di un artíkulo di korant, unda un lote a keda konfiská. Fiskal a puntra durante e tratamentu di e kaso kon e por ninga ku e telefòn ta di dje, si a bin haña basta potrèt di dje riba esaki.

A pidi un kastigu di 8 aña pa Yeung pero wes mr. Paulides a baha e demanda ku un aña i kastigá Yeung na 7 aña. Tambe a bisé ku si e no ta di akuerdo ku e sentensia e tin 14 dia pa apelá esaki.