‘Tragomeisjes’ nan tabata haña but di 200 florin si nan kome den orario di trabou

285
WILLEMSTAD,—- Vários dama a deklará kontra di e doñonan di La Tasca unda nan a asta bisa ku nan tabata haña but pa kome den orario di trabou i tambe si haña nan ta papia na telefòn. Tabata un kaso  basta emoshonal, kual por a mira ku e damanan víktima a sinti ku nan a drenta un hanchi sin salida.

Esaki mirando ku nan a bin Kòrsou pa traha pa traha pa nan pan i kria nan famia, pero di un forma ilegal. Pa e motibu aki nan no por reklamá e abuzu kontra di nan mirando ku nan lo keda deportá inmediatamente lo no haña trabou. Nan a deklará ku tabata laga nan traha hopi duru, miéntras tabata obligá nan keda den hotèl Carlos i ku nan no por a ni papia na telefòn den e hotèl.

Nan a bisa ku tabata hinka 4 hende den un kamber hopi chikí i ku no por a bai baño ora nan ke. Mas aleu nan a trese dilanti ku tabata pròp nan den e kamber i ta haña solamente un yabi. Otro punto ku nan a trese dilanti ta e echo ku nan tabata obligá na bisti ‘sexy’ i bisti sapatu haltu. Ounke doñonan di e negoshi La Tasca a ninga esaki durante tratamentu di e kaso, fiskal a bisa ku tin vários deklarashon kontra di nan, kual tur ta deklará kasi meskos i ta konsistente.