AIVD a pone bida di periodista na peliger

51
periodista Van Hout a haña daño perhuisio di 865.000 euro pa fayonan AIVD
DEN HAAG—Servisio di inteligensia AIVD a hasi fayonan grandi ku a pone bida di periodista Bas van Hout na peliger.

Van Hout tabata un fuente di informashon pa e servisio. Dor ku informashon riba su persona no a keda sufisientemente protehá, esaki a lèk pa baho mundu ku el a papia ku AIVD. Apesar ku AIVD tabata sa ku e ta kore peliger, nan a neglishá di informe segun Volkskrant. Esaki segun un investigashon sekreto di komishon supervishon riba servisionan si seguridat i inteligensia (CTIVD) bou di instrukshon di eks-presidente di kolegio di prokuradornan genral Harm Brouwer. Konklushon di e supervisor ta ku estado a aktua ilegal i kontra bon gobernashon. Entre 1997 i 2002 Van Hout a papia ku servisio di seguridat interno BVD, e servisio prome ku AIVD. BVD a hasi investigashon e tempu ei riba korupshon i bandanan entre baho mundu, trafikantenan di arma i organisashonnan terorista. Pa e fayonan ku estado a komete den e kaso aki a paga Van Hout un suma di daño perhuisio di 865.000 euro den sekreto. E periodista tin derecho riba e suma aki pasobra pa motibu di e lekmentu e no por sigui funshoná den su profeshon, asina korte di Amsterdam a konfirmá desember 2018. E veredikto ta sensurá, anonimisá riba website di Rechtspraak.nl.