Debut Talento Lokal Kiana Cova Ku Rapper Jalal Oba

245
Mundu ta bai tende hopi di e hóben kantante aki.

WILLEMSTAD,—-E talento lokal ku su nòmber ta Kiana Cova a lansa kolaborashon musikal “Diablo” ku rapper Jalal Oba. Konosí pa hit manera “Eenzaam”, Jalal Oba su kantika nobo, “Diablo”, a wòrdu produsí pa Tommy Lee. Kiana su bunita stèm ta hasi impakto mesora. Ademas Kiana a skohe pa kanta na Papiamentu, ku ta duna e kantika aki un balor adishonal pa nos tur aki na Kòrsou.

Aktualmente Kiana ta biba na London despues di a realisá un dòbel Bachelor’s Degree na Universidat di Nijenrode i na Universidat di Westminster. Ku metanan sumamente ambisioso Kiana ta sigui pa su próksimo reto ku ta su Master’s Degree.

Aunke Kiana semper a konsiderá músika komo un paso lógiko den futuro, e petishon di Jalal Oba a yega poko inesperá. Pero ku e posibilidat pa ta asina involukrá den e produkshon i pa inkorporá un tiki di su dushi Kòrsou aden, Kiana no por a laga e chèns pasa bai.

E kantika a bai live riba e dia di ayera, riba e sistema  YouTube kaminda ku tur hende por  a disfrutá di e video clip i por skucha e kantika riba Spotify i iTunes. <Mester bisa ku Kiana no ta para ketu niun momentu so i ya e tin un próksimo kolaborashon, ku tambe ta na Papiamentu, ku pronto lo wòrdu lansá. Pues keda pendiente di mas di e bunita talento lokal aki.