E hungadó mas bieu ta bira kampion den torneo pinpòn 60+

300
Momentu di entrega di premio.
WILLEMSTAD—Tony Wijshijer a marka historia den e deporte di pinpòn aki na Kòrsou. Esaki den un torneo organisá pa e Federashon Tènis di Mesa Kòrsou pa nos masternan di 60 aña di edat, òf mas grandi.

Pues den un evento pa “VETS 60+’, ku partisipashon di 12 hungadó, tabata e hungadó di mas edat, kende a sa di bai ku e titulo.Tony di 77 aña di edat ta logra gana di Raymond Begina, e number 1 klasifiká den e kategoria Master, ku skor relativamente fásil di 3-1.

Ya den e weganan di klasifikashon por a nota ku Tony ta bai yega hopi leu, pero ku e duda ku su kondishon físiko lo por lag’é na kaya.Loke a fasilit’é ta e hecho ku durante hinter anochi e la pèrdè apénas 2 sèt. Na un manera konvinsente e tabata gana su weganan, kaminda poko poko tur e mirónes tabata realisando ku ta bai sosodé kisas algu ku no ta bai konosé ripitishon pa añanan benidero.

Un hungadó di tal edat ku hopi reakshonnan inkreibel, tabata hala pone e weganan poko poko na su banda, pero ku hopi esfuerso pa no agotá.Mester remarká ku den semifinal, Raymond na wowo di angua a sigui pa final, kaminda ku e mester a bai tur 5 sèt pa gana di Fawzy Ayubi 3-2.

Un derota aki tambe lo tabata algu hopi sorprendente, komo esei tampoko por a wòrdu sperá. Asina pues por mira bèk riba un torneo i kompetensia hopi interesante, kaminda un biaha mas ta wòrdu probá ku bo por keda den e deporte aki aktivo na edat hopi haltu, kual sigur tambe ta algu hopi bon pa bo salú.Na final di e torneo, e finalistanan por a risibí nan premionan di e patrosinadó di e torneo aki, ku tabata Compunel & Sons BV.