Maduro lo firma akuerdo ku Krus Kòrá pa aselerá yudansa humanitario

67
Maduro no a divulgá masha detaye di e akuerdo aki.

CARACAS – E gobernante di Venezuela, Nicolas Maduro, a indiká ku den oranan di ayera el a firma un konvenio ku Krus Kòrá Internashonal pa asina por ‘aselerá’ e ingreso di yudansa humanitario na e pais, ku ya pa sinku aña ta pasando den un krísis severo pa ku material i medikamentu nan.

E mandatario venezolano, kende ya na luna di aprel último a aseptá e yudansa di Krus Kòrá anunsiando un konvenio ku e organismo, no a duna mas detaye relashoná ku e akuerdo aki i a indiká un biaha mas ku e pais ya a risibí yudansa i donashonnan di e organismo aki i di paisnan manera China i Rusia.

Venezuela ta e pais ku mayor reserva petrolero di planeta pero tòg ta pasando den un krísis ekonómiko severo ku ta keda ekspresá, entre otro elementonan, pa inflashon inkreibel i un skarsedat serio di remedi.

E diferente sindikatonan di salú a denunsiá na vários okashon e deterioro di e hospitalnan públiko di e pais i ku esaki nan tambe ta keda afektá pa e fayonan den ekipo, infrastruktura i falta di koriente òf awa.

For di aña 2017, e gremio sanitario i e oposishon venezolano ta pidi gobièrnu pa permití entrada di yudansa humanitario na e pais, pero tabata te na inisio di e aña aki numa ku Maduro a aseptá donashonnan.