Mas di 100 venezolano den wèlga di hamber na Trinidad & Tobago

236

SAN JUAN – Mas di 100 venezolano ku ta permanesé den e Sentro di Detenshon di Inmigrantenan di Aripo, ne Trinidad & Tobago, a inisiá ku un wèlga di hamber komo protesta pa e tardansa pa permití nan partisipá den e proseso di registro pa optené un pèrmit di estadia formal na e pais.

Un bosero di e sentro di detenshon a informá den oranan di djaweps último na medionan di komunikashon ku un total di 69 hòmber i 39 muhé di nashonalidat venezolano a suma nan mes na e wèlga di hamber for di djamars último.

E mayoria di e detenidonan venezolano, ku na un prinsipio ta elegibel pa registro, ta rabiá pa motibu ku e ritmo ku kua nan ta keda hibá pa sentronan di registro ta abou abou i a indiká ku ta for di djamars último, solamente 10 persona a sa di realisá e proseso.

Algun di esaki nan tin shete òf ocho luna den e sentro i un di esaki nan, un hóben di apénas 19 aña, kende a pèrdè su mayornan, a intentá di pone fin na su bida na tres diferente okashon.

E funshonarionan ku ta traha den e proseso di registro a rekonosé ku e proseso ta largu, ku diferente retraso i ku tin míles di venezolanonan sperando pa pasa trámite durante e simannan di inskripshon, kua a inisiá dia 31 di mei último.

E minister di Seguridat Nashonal di Trinidad & Tobago, Stuart Young, a informá na luna di desèmber último, ku a gasta mas di 46 mion den tres aña na mantenementu di e sentronan di detenshon pa inmigrantenan i ku den yudansa na e personanan ku ta na e sitio.