Otro siman ta realisá parti dje grabashon Worldwide di Real Gangsta Millio i Master P

329
Aki nos por mira Real Gangsta Millia i Master P. Nan a unu pa saka un grabashon ku lo kore rònt mundu.

WILLEMSTAD,—-No ta un sekreto ku un dje rappernan merikano di mas famoso na mundu ta Master P. Ta trata akinan di un aber ku ta hopi bon konektá na Merka i ta amigu personal di masha personahe di selebridat na Merka.

Manera ta konosí for di komienso di aña ta konosí ku Master P ta biahando pa Repúblika Dominikana. Un dje motibunan di esaki ta debí na un relashon di trabou ku el a kuminsá ku Nutu Wawoe kual su nòmber artístiko ta Real Gangsta Milla. Esaki a trese kuné ku nan a yega na e entendimentu pa bai lansa un vershon nobo bou dje nòmber di Worldwide. E nòmber ta papia pa su mes.

E intenshon ta pa e produkshon aki yega rònt mundu. Pa lokual ta trata e kansion riba su mes ta asina ku den dje lo figura diferente nashonalidat ku lo karga bandera di su pais. Pa lokual ta trata e video clip E Mulina Farandulero a keda informá ku lo tin partinan klave dje grabashon ku lo keda efektuá aki. Real Gangsta Milla kende tin un amor grandi pa su pais natal kier pa atraves dje produkshon aki rònt mundu sera konosí ku Kòrsou.

Ta asina ku ya kaba e produktor di Master P a skohe sitionan stratégiko pa por a realisá e grabashon aki. Bandera di Kòrsou lo figura primodialmente den e produkshon, segun nos a keda informá. Ya a skohe esnan di Kòrsou ku lo figura den e grabashon aki. Unu di nan ta Miraiza Pennafort kende ta un aspirante pa bira modelo internashonal. Relashoná ku e grabashon aki ya kaba sierto trámitenan a keda hasi pa usa sierto partinan di Kòrsou úniko. Si tur kos kana segun plan pa otro siman mes lo graba un parti dje produkshon aki na Kòrsou.