Aparentemente ‘Big Papi’ tabata sa ku su bida ta kore peliger

52
David Ortiz lo ser trasladá pa e hospital di Boston Massachusetts.
SANTO DOMINGO – E eks pelotero dominikano i strea di Liga Grandi i di e ekipo Boston Red Sox, David Ortiz, djadumingu último a keda tirá den lomba na momentu ku e tabata sintá na e bar Dial ku ta situá na e avenida Venezuela, na e parti ost di e siudat kapital Santo Domingo di Repúblika Dominikana.

David ‘Big Papi’ Ortiz  tabata sintá den kompania di algun amigu den oranan di anochi na momentu ku un hòmber a aserk’é di parti patras i los un tiru dirigí riba dje. E bala a drenta na lomba di Ortiz i a sali na altura di su pechu i a alkansá un amigu di Ortiz, e presentadó di televishon Jhoel López, na altura di esaki su bèl di pia.

Entretantu David Ortiz a ser ópera i ta rekuperando, pues ámbos herido ta for di peliger.  E tata di David Ortiz, Americo Enrique Ortiz, a deklará ku e operashon a bai bon i ku David lo rekuperá bèk. “Nos lo tin Big Papi pa hopi aña mas ku nos.” Ayera a transportá David Ortiz pa e hospital di Boston Massachusetts pa un kuido médiko mas avansá.

E investigashon relashoná ku e atentado kontra David Ortiz mes ta avansando di forma rápido. Ya e prokurador general Jean Alain Rodríguez a atvertí ayera den oranan di mainta ku e kaso aki no ta korespondé na un kaso di atrako òf violensha di kaya. Tur kos ta indiká ku ta trata aki di un reglamentu di kuenta personal.

Segun informashonnan optené pa e korant Diario Libre, e eks pelotero lo tabatin un relashon amoroso ku un muhé kende tabatin relashon ku un supuesto narkotrafikante. Di forma anónimo amigunan di Big Papi a konta ku ya na algun okashon nan lo a atvertí e pelotero di e peliger ku e ta kore. Pero apesar di e atvertensianan di su amigunan, Ortiz lo a sigui bishita e muhé aki. Esaki aparentemente lo ta e motibu prinsipal relashoná ku e krímen aki.

E hóben Feliz García a keda gará i seguidamente a keda arestá pa kuerpo polisial, despues ku esaki tabata trata na hui despues di e atake riba David Ortiz na bar Dial di e avenida Venezuela. Feliz García (un kantante di rèp) ta un sospechoso den e kaso aki i ta kere ku e lo tabata esun ku mester a transportá e individuo ku a tira.