Despues di Gran Premio di Canada…… Ferrari a apelá e sanshon di tempu imponé riba Sebastian Vettel

34
Ferrari a disidí di apelá e sanshon di tempu imponé riba Vettel.
MONTREAL – E ekipo di Fórmula 1, Ferrari, a disidí ku nan ta apelá kontra di e sanshon di tempu imponé riba nan piloto Sebastian Vettel durante di e Gran Premio di Canada djadumingu último, kual a kosta e piloto e viktoria.

Tabata despues di 48 buèlta ku Vettel ta haña un sanshon di 5 sekònde debí na e echo ku e la kore di forma iresponsabel (peligroso), na momentu ku e la subi e pista bèk, despues di a sali for di esaki den un bògt i a kore un pida riba yerba segun e lidernan di e kompetensia.

“Seb no por a aktua di niun otro forma”, asina e lider di e ekipo Mattia Binotto a komentá riba e wèpsait di Ferrari. “Pa e motibu aki mes tambe nos a tuma e desishon di apelá e sanshon imponé.”

Pa motibu di e sanshon imponé aki riba Vettel, e aktual kampion mundial Lewis Hamilton a resultá e ganadó di e Gran Premio di Canada. Charles Leclerc, miembro di Ferrari, a finalisá na di tres lugá. E hulandes Max Verstappen a finalisá na puesto sinku.

Ku e resultado aki e piloto britániko Lewis Hamilton ta amplia su bentaha komo lider apsoluto riba e tabla di posishon. Pa loke ta e ekiponan, e ekipo di Mercedes tambe ta komandando ampliamente.