Guaidó a indiká ku Maduro a habri frontera ku Colombia pa preshon di siudadanonan

72
Juan Guaidó, kabesante di Parlamento.

CARACAS – E kabesante di Parlamento, Juan Guaidó, rekonosé pa mas di 50 pais, a indiká ku e gobièrnu di Nicolas Maduro a ordená reapertura di paso fronteriso ku Colombia debí na e preshon di e siudadanonan.

Pa e “preshon di siudadanonan pa motibu ku tin un nesesidat latente na henter e pais” , segun Guaidó a indiká na periodistanan despues di a keda konsultá relashoná ku e medida ku chavismo a indiká i ku a kuminsá den fin di siman tras di lomba. Esaki na momentu ku a rehabrí e paso peatonal entre e estado venezolano di Tachira i esun kolombiano Norte de Santander.

Guaidó a rekordá ku konforme e krísis ekonómiko na e pais tabata intensifiká, mas venezolano a kuminsá pasa e frontera diariamente pa buska kuminda i medisina ku tabata skars na Venezuela òf pa emigrá.

E lider di Parlamento a rekoré e barionan pober di Miranda, serka di Caracas, huntu ku e eks kandidato presidensial Henrique Capriles.

Di otro banda, na momentu ku el a keda konsultá relashoná ku e posibilidatnan di un enkuentro nobo na Noruega ku representantenan di e asina yamá “revolushon bolivariano” pa avansá di konstrukshon di diálogo polítiko, el a bolbe indiká ku e kombersashonnan aki lo keda reanudá na medida ku ta posibel ku Maduro por kita for di poder.

Venezuela ta pasando den un skala di tenshon polítiko for di luna di yanüari último, na momentu ku Maduro a hura un mandato nobo di seis aña despues di gana un elekshon ku a keda tachá di froudulento pa oposishon i ku no ta keda rekonosé pa gran parti di e komunidat internashonal.