Kayanan a keda tur na kolo despues di Color Walk

160
Willemstad,– E aktividat di Color walk tin algun aña kaba ta tumando lugá i tur aña di nobo por a tuma nota ku mesora despues di e evento un kompania di limpiesa tabata pasa i hasi e lugá limpi limpi bèk, di manera ku bo no tabata nota mes ku e aktividat a tuma lugá.

Tabata pasa ku mashinnan di preshon i limpia tur kaminda i te hasta e matanan tabata bira bèrdè bèrdè, klenkunan tabata keda limpi limpi sin nada di kolo.

Vigilante no sa kiko a pasa, pero nos a pasa un dia despues di e aktividat aki, despues ku a pasa hasi e trabounan di limpiesa, pero por a tuma nota ku kayanan tabata kòrá, ros i hel i matanan tabata tur na kolo.

E trabounan sigur no tabata manera tabata e kaso den añanan anterior i ta bon tòg pa e organisadónan di e evento aki tene kuenta ku esaki i kontrolá e trabounan despues di e evento tambe ta bon pa instansianan ku ta duna pèrmit pa tipo di aktividatnan asina, tene kuenta ku esaki. Vigilante no sa ni no ta interesá pa sa ken tabata hasi trabou di limpiesa, ken ta hasiendo esaki awor, òf si ta e mesun kompania, echo ta ku e aña aki e trabounan di limpiesa di e kolonan despues di e aktividat a laga hopi di deseá.