Klasifikando pa kampionato mundial i weganan olímpiko….. Dafne Schippers a imponé rèspèt durante di FBK Games

40
Dafne Schippers ta klasifiká pa kampionato mundial i weganan olímpiko.
HENGELO –  E atleta hulandes Dafne Schippers a kustumbrá su fanátikonan ku su viktoria riba 100 meter durante di e FBK Games i un biaha mas a imponé rèspèt durante e kompetensia aki.

Tabata durante e fin di siman tras di lomba ku e atleta oriundo di Utrecht a registrá un tempu di 11,06 sekònde na Hengelo i ku esaki no solamente e ta logra su partisipashon na e kampionato mundial di Doha, pero alabes a logra klasifiká pa e weganan olímpiko di 2020 ku lo tuma lugá na Tokyo.

Schippers tabatin un salida magnífiko i a gana e kareda ku fasilidat. Angela Gabriela Tenorio di Ecuador i Vitoria Cristina Rosa di Brazil a finalisá na puesto dos i tres den un tempu di 11,20 i 11,24 respektivamente. Jamile Samuel a finalisá na puesto sinku registrando un tempu di 11,28 sekònde. E viktoria dilanti su propio públiko tabata algu bunita, pero ta e tempu ku e la registrá tabata e loke mas a duna Dafne Schippers un satisfakshon enorme.

Despues di un temporada 2018 ku basta opstákulo, kambio di entrenadó di Rana Reider pa Bart Bennema, i un problema di lomba despues di a kai for di trapi na prinsipio di e temporada aki, e kareda na Hengelo aki tabata e chispa tan soñá pa e strea di atletismo hulandes.