Kòrsou kampion ‘King’s Cup 2019’ na Tailandia

51
Selebrashon despues di logra e titulo.
TAILANDIA—E selekshon di futbòl lokal dirigí pa tékniko Remko Bicentini a logra e titulo máksimo den torneo ‘King’s Cup 2019’ na Tailandia. Esaki na momentu ku nan a logra triunfo na pinalti den e gran final djasabra último den oranan trempan di mainta, orario di Kòrsou. Den e wega aki Kòrsou a topa Vietnam den e gran final.

Esaki despues di a gana India 3-1 i Vietnam a gana e ekipo di kas 1-0. Djasabra tabata primeramente India ku tambe ta gana e ekipo di kas ku skor mínimo pa logra e terser puesto, miéntras ku e wega final a keda empatá na 1 despues di e 90 minütnan reglamentario. E wega a sosegá sin anotashon i tabata Jurich Carolina, for di un tiru pafó di área penal ku ta manda Kòrsou ariba, pa seguidamente Vietnam logra e gol di empate.

Den tirunan penal e ekipo di Vietnam ta tira unu haltu riba gol i a nota 4, unda Kòrsou ta kobra 5 tremendo pinalti, pa asina gana 5-4 i logra e titulo máksimo di e di 47 edishon di e torneo aki. Charlison Benschop, Elson ‘Sontje’ Hooi, Jarchinio Antonia, Leandro Bacuna i Michael Maria, tabata esnan ku a kobra eksitosamente for di distansia di 11 meter.

Despues di wega tabatin entrega di premio unda kapitan ‘Cuco’ Martina a tuma e trofeo komo ekipo kampion i demas miembronan a risibí nan medaya, komo rekuerdo di e gran logro aki, den kuadro di preparashon riba e ruta pa Kopa di Oro 2019.

Kòrsou a hunga den e final ku Eloy Room, Jurien Gaari, Darryl Lachman, kapitan ‘Cuco’ Martina, Jurich Carolina, Michael Maria, Leandro Bacuna, Roly Bonevacia (Gervane Kastaneer), Gevaro Nepomuceno (Jarchinio Antonia), Elson ‘Sontje’ Hooi i Jafar Arias (Charlison Benschop).