“Pabien i awó ban pa El Salvador”

51
Miembronan di nos linja defensivo.
WILLEMSTAD—Nos selekshon nashonal tabata den akshon durante último dianan i lo bai ta den akshon djaluna benidero den Kopa di Oro. Esaki mesora ta lanta atenshon i deseonan pa un bon resultado di nos tur komo YDK. Un ke otro unda manera ya tradishonalmente Eldon ‘Peppie’ Sulvaran, tambe mesora ta kompartí su pensamentu relashoná ku nos ekipo, kontrinkante i kompromiso, ku Deporte Vigilante su fiel lektornan. Esaki e biaha aki, di e siguiente manera:

Kampion ‘King’s Cup 2019’

“Selekshon nashonal di futbòl a gana ‘Kings Cup 2019’ na Tailandia meresidamente. E kontrinkantenan tur ta rankiá mas abou ku nos elenko nashonal riba ranking di FIFA.

Pero mester bisa si ku e sirkunstansianan klimatológiko a benefisiá nan. Na e parti di mundu ei, nan a kustumbrá hunga den temperaturanan haltu, ku un ambiente húmedo sin hopi bientu. E bentaha aki por a ripara mesora den e weganan. Nan tabata mas movibel ku nos hungadónan.

Apesar di esei, ku eksepshon di e di dos mitar kontra India, den kual nos tabata gana kaba 3-1 den un yobida i durante e promé 15 minütnan kontra Vietnam djasabra den e final, nos a hunga hopi kontrolá.

Inisio Kopa di Oro

Djaluna awó na Kingston, Jamaica, ‘Kopa di Oro’ ta kuminsá pa nos.  Esaki si ta di kompletamente otro nivel. Tur nos kontrinkantenan, El Salvador, Hondúras i Jamaica ta rankiá mas haltu ku nos den mundu futbolístiko.

El Salvador

Nos siguiente rival, El Salvador, ta posishoná na puesto number 71 ku ta 12 puesto mas haltu ku nos riba lista di FIFA. Esaki ta un pais ku a bai mundial dos biaha kaba (1970 i 1982). Den e último aña for di yüni 2018 nan a gana, Hondúras, Haiti dos biaha, Guatemala, Jamaica i Perú. Kier men ta di un otro midi ku India i Vietnam. Nos konosé nan wega kaba si, paso nos a enfrentá nan kaba e último dos añanan, entre otro den ‘Kopa di Oro’ dos aña pasá i nos a pèrdè ku skor di 0-2. Pero nos a krese i sigur ta mihó ku 2 aña pasá ku mas hungadó profeshonal awor.

‘La Selecta’ su wega ta unu di hopi pase kòrtiku i hopi moveshon. Un estilo manera Vietnam, pero di un nivel muchu mas haltu.

Prekupashon

Tin un kos di preokupashon si ku a sali for di e weganan na Tailandia. Esei ta e laman di espasio ku nos ta regalá dilanti nos defensa sentralnan. Michael Maria so no por kubri e espasio ei. Tantu India komo Vietnam a demostrá esei. E gol di Vietnam ta un ehèmpel klásiko.

Bacuna of Bonevacia huntu ku Maria

Kisas por adaptá i laga Leandro Bacuna òf Roly Bonevacia huntu ku Maria, hunga poko mas defensivo den bolante. Tantu Leandro komo Roly por hunga einan den un 4-2-3-1. Preferibel Roly, paso Leandro sa ‘kue’ su karchinan i sa okashoná tiru liber. Na rant di área penal esei por ta ferfelu. Ademas, Leandro un poko mas ofensivo den bolante, ta un forsa èkstra ku su bon tirunan.

Mester sera e espasio di tur manera, paso El Salvador i tambe Hondúras ta bin ku mas toke i mas téknika mei mei di tereno. Jamaica ta hunga mas riba forsa físiko. Si nos no logra kibra e atakenan mei mei di tereno e por bira demasiado pa ‘Cuco’ Martina i Darryl Lachman so atendé kuné, manera e weganan resien a demostrá.

Eloy Room

Eloy Room a skapa nos na diferente okashon. Por lo demas e tim ta bon. Gervane Kastaneer ta poko leshoná. Ku su forsa i empuhe pa gol e por ta un balor agregá.

Kompetensia den ofensivo

E kompetensia pa e puestonan ofensivo ta bon sigur. ‘Sontje’ Hooi, Gevaro Nepomuceno, Jarchinio Antonia i Gino Van Kessel ku por hunga den punta di lansa tambe, tur ta mustra di ta den forma i di mas o ménos mes un nivel.

Si Kastaneer rekuperá kompletu e por hunga ofensivamente tantu na linea komo den punta di atake.

Jafar Arias tin bon dominio di bala i ta un hungadó ku bo por entregá e bala na dje.

Charlison Benschop ta un peliger konstante.

Finalmente natural ta Remko ta disidí ken ta su mihó diesun nan.

El Salvador

Un gran parti di e selekshon di El Salvador ta hunga na kas. Ta un ekipo ku ta train hopi huntu na kas i ta hopi akoplá. Nan mihó hungadónan si ta hunga pafó di kas. Darwin Cerén, un bolante defensivo ku ta kore hopi, ta hunga den e liga máksimo di Merka MLS, pa e ekipo di Houston. Meskos ta konta pa nan otro bolante, Andrés Flores di e ekipo di Portland, huntu ku Jaime Alas ku ta hunga na Guatemala, nan ta forma e núkleo di un bolante di hopi toke di e selekshon.

Nelson Bonilla ku tabata hunga na Portugal, pero ku awor a bai Tailandia, ta nan punta di lansa. E la bora nos 2 aña pasá den ‘Kopa di ‘Oro’ 2017.

Nan máksimo goliadó si ta keda kas, Rodolfo Zelaya di e ekipo di MLS Los Angeles.

Nos meta

Si nos logra un viktoria djaluna awó kontra El Salvador, nos ta dal un bon paso pa por sigui. Ku un empate kontra Hondúras òf Jamaica, kasi sigur nos lo keda den kontienda.

Esei mester ta e meta e biaha aki. Biaha pasa nos no a hinka niun gol i a bin kas man bashí. Aworakí ku e refuersonan profeshonal di e último aña, pasa e promé buèlta ta den nos posibilidatnan. Tur esaki riba kaminda pa mundial 2022”.