Sinku persona asesiná den tiroteo den bar di Brasil

69
Outoridatnan hasiendo investigashon na e sitio di e tiroteo.

SAO PAULO – Sinku persona a keda asesiná den oranan di anochi den interior di un bar na e lokalidat di Bento Gonçalves, sùit di Brasil, pa un grupo di deskonosí ku despues a sa di huí for di e sitio.

E matansa a keda kometé pa un grupo di seis persona ku a yega armá den algun vehíkulo na e sitio, na alrededor di 10or di anochi i a efektuá e tirunan kontra un grupo di hóben di entre 18 i 28 aña di edat.

Den deklarashonnan na medionan di komunikashon, outoridatnan a indiká ku na e sitio a registrá mas di 40 tiru, mayoria di nan di un pistol 9 mm.

Kuater di e víktimanan a pèrdè nan bida na e sitio di e tiroteo, miéntras ku un di nan a keda trasladá te un sentro médiko, unda lamentablemente el a fayesé.

Segun medionan di komunikashon di e pais, e motibu di e krímen lo por ta relashoná ku tráfiko di droga, ya ku tin un disputa pa kontrol den e region unda e matansa a keda produsí. Inkluso a indiká ku dos di e sinku víktimanan tabatin antesedente penal.

Outoridatnan ademas a indiká, ku nan a keda na e sitio te den oranan lat pa asina hasi investigashon i por haña kualke pista na e sitio, esaki debí ku bisiñanan no ke papia di esaki pa miedu di represaya.

E tipo di akto i matansanan aki ta normal na e sitio, entre siudatnan grandi di Brasil i inkluso a oumentá den e último añanan mei mei di e pelea entre gèngnan rival pa kontrol di rutanan di narkotráfiko i kresementu di milisia, formá pa gruponan di polis i eks polisnan.

Na luna di mei último, 11 persona a keda tirá i matá den un bar di Belém, kapital di e estado di Pará i un di e regionnan mas violento di e pais, pa un grupo di hòmber armá.

Segun datonan divulgá, Brasil a alkansá un rèkòrt históriko di 65.602 homisidio na aña 2017, loke ku ta suponé di ta masoménos 31.6 morto violento pa kada 100.000 abitante.