120 mucha ya a inskribí pa klínika di Real Madrid na Vesta

17
WILLEMSTAD—Un total di 120 mucha ya a konfirmá nan partisipashon pa e klínika di futbòl pa hóbennan riba nos isla. Esaki ta e klínika organisá pa e organisashon di futbòl lokal Vesta di Sta Maria i bisindario, konhuntamente ku e organisashon di futbòl for di Spaña, Real Madrid. Un ke otro lo tuma lugá durante di e periodo di 6 te ku 9 ougùstùs benidero, riba tereno di Vesta, den e kompleho deportivo di e ekipo den bario di Sta Maria.

Tabata ayera den oranan di atardi, ku dirigentenan di e organisashonnan organisadó, a tende un ban topa prensa deportivo, kual tabata bon bishita unda a duna informashon di e evento i desaroyonan ku tin relashoná ku e preparashonnan.

E klínika aki ta speshal pa hóben futbolistanan, unda na final 2 diferente mucha, huntu ku tambe un coach, lo biaha pa Spaña pa asina ta di bishita na un klínika serka e organisashon. Tambe lo por regla pa mayornan, na preis rebaha, por hasi e biahe.

Preparashonnan ta kanando segun plan, unda ku ya 120 mucha a konfirmá nan partisipashon, apesar ku ta trahando pa alkansá 150 mucha na Kòrsou. Na Boneiru e kantidat di muchanan ta 85, miéntras ku lo traha tambe pa por tin un klínika na tantu Aruba komo St. Maarten mas na fin di aña.

Pa loke ta e fondonan optené, despues ku kada mucha paga 300 dòler pa partisipashon unda nan lo haña tur artíkulo di e ekipo, e fundashon enkargá na nòmber di e ekipo spañó ta yuda muchanan di ménos rekurso na sigur mas ku 80 diferente pais, ku entre otro kuminda.

Ayera durante di e atardi ku prensa, tabatin tambe representantenan di spònsernan Digicel i Banco di Caribe entre otro presente, kende nan tambe a hiba palabra, meskos ku tambe ta e kaso ku representante di e fundashon Real Madrid i e representante di Vesta Erik ‘Lou’ Lourens i e representante di e fundashon na Kòrsou, kende ta Ricardo ‘Riky’ Martinus, e dirigente atministrativo di aña, pa loke ta premiashon FFK su temporada tras di lomba.

Pues un atardi, unda a presentá e direktiva organisadó i mesora sera prensa konosí ku patrosinadònan.