Grupo Elias den korte kontra deurwaarder

1086
Punda—E banko internashonal, BNP Paribas a laga imponé beslag riba akshon (aandelen) na diferente kompania manehá pa Gregory Elias, den su struktura di off shore. Ta trata di e kompanianan, United Trust Company NV, United International Trust NV, Croci International NV , International Future Ventures i Centenial Management NV. E banko BNP Paribas a laga pone beslag riba nan bolsa di akshon.

E beslag ta resultado di un kaso unda e banko BNP Paribas a bin haña derechi di imponé beslag despues ku e kompanianan menshoná huntu ku un dama di fam Crociani a pèrdè un wisio sivil den korte na Kòrsou. Representantenan di BNP Paribas, abogado Willemieke Princee, a ordená e deurwaarder Robertico Ramazan pone beslag. Ta trata di un asina yam’á “bewijsbeslag”. E beslag ta wòrdu permití pa krea tempu pa e kontra partido por investigá e struktura di e konflikto. Na febrüari último, Korte Sivil na Punda a duna e banko BNP Paribas rason den un disputa pa rekonosementu internashonal pa protekshon i rekuperashon di un bolsa di 132 mion dòler estado unidense. E prosedura sivil tabata kontra di e kompanianan menshoná. Mediante un órden di korte, for di 2018 beslag a wòrdu imponé. Den nan demanda, e kompanianan manehá pa Elias a supliká pa kita e beslag. Esei no ta logrando. Konsekuentemente, e kompanianan a inisiá un proseso awor di daño okashoná pa deurwaarder Ramazan, debí na beslag imponé.