Hulanda ta saka dos werfano hulandes for di teritorio IS

63
gobièrnu franses ta buska e muchanan
DEN HAAG—Hulanda a buska dos werfano hulandes na Siria norte, teritorio di teroristanan Islamic State.

Asina gabinete ta konfirmá den un karta na Tweede Kamer. Ta trata di un akshon konhunto ku Fransia ku a buska 12 mucha. Gobièrnu franses a traslada e muchanan hulandes pa nan voogd hulandes, segun gabinete. Gabinete a gradisí Fransia pa esaki. Den e karta ta enfatisá ku ta trata di dos werfano hulandes hóben ku ta biba bou di sirkunstansianan inhumano i sin ningun forma di outoridat di mayornan den un kampo na Siria i kaminda no tabatin ningun hende outorisá pa tuma nan kuido. E mama di e muchanan tabata Karenia J di Zwolle, ku a fayesé komienso di 2019. E abogado di e muchanan (un mucha muhé di 4 i mucha hòmber di 2 aña) no ta sorprendí ku a manda buska nan. E minister a bisa ku e ta wak kiko por hasi pa e werfanonan. Tin disponibilidat pa buska e muchanan aki. Tin kontakto ku Konseho pa Protekshon di Muchanan i ta screen famianan pa eskluí relashon ku yihadistanan i wak si nan tin kalidatnan pedagogiko. Hulanda no tin relashonnan diplomátiko ku Siria norte, ku no ta un pais ofisialmente. E kurdonan ta buskando poder. Komienso di 2019 Hulanda a investigá si ta posibel pa manda buska algun dama i nan yunan ku a bai Siria. Premier Rutte a enfatisá ku hulandesnan no ta bai Siria norte pa buska e grupo. Mas di 100 hulandes ta pega den kampo di refugiadonan i prison sirio-kurdo. Segun sifranan di servisio di inteligensia AIVD ta trata di 55 adulto i 85 mucha.