ICONS un kaso hopi serio den nos farándula lokal

407
Hopi duru nan a dal djasabra tras di lomba den Urban Venue. 

WILLEMSTAD,—-Djasabra tras di lomba e agrupashon musikal ICONS a hasi nan debut den nos farándula. Mester bisa ku den kaya tabatin masha hopi komentario rondó di e debut di e banda ariba menshoná, paso no ta un sekreto ku tur hende ker a mira e tende kon e banda ta zona.

Ya algun siman tras di lomba e banda a hasi nan debut na Hulanda i esaki a bai den gran forma, pa loke ta trata djasabra tras di lomba. E agrupashon musikal ICONS  sin duda a tapa boka di hopi hende, prinsipalmente na e parti zonido.

Mester bisa ku e front di e banda a hasi e trabou ku nan mester a hasi i tambe kada un músiko a hasi e trabou ku hopi hende a spera di nan. ICONS sigur a dal hopi duru den Urban Venue, e banda a presentá pone e lugá ariba abou, tantu Hunneley Felicia i Stevens Dainel a pone e lugá airba abou. Pero loke ku DjuDju-V i Amos Balentin a hasi ku e lugá si ta di otro mundu, den un otro palabra ámbos kantante a hisa e lugá dal abou.

E piesa “Un ta kai bou di bo i Wauw Effect” a pone tur hende move i mas importante ta ku e públiko presente a kanta huntu ku e dos kantante nan ariba menshoná. Un pabien ta bai na gerente di agrupashon musikal ICONS ku nan debut di djasabra tras di lomba.