Kapital haitiano ta paralisá despues di manifestashonnan violento

46
Situashon ku a keda atras despues di protestanan serio di fin di siman tras di lomba.

PORT-AU-PRINCE – E kapital di Haiti a keda praktikamente paralisá despues di manifestashonnan violento ku a keda registrá djadumingu último i ku a keda konvoká pa oposishon na vários siudat. Esaki pa asina eksigí dimishon di e presidente Jovenel Moise i esaki lamentablemente a laga saldo di vários morto atras.

E transporte publiká i skolnan a keda paralisá den nan totalidat na Port-Au-Prince, unda un gran kantidat di negoshinan tampoko no a habri nan mortonan den oranan di ayera.

Un situashon similar a keda registrá na otro departamentonan unda a hisa barikadanan pa blòkia kareteranan ku ta konektá kapital ku otro siudatnan di e pais.

Den oranan di djaluna mainta tambe a skucha vários zonido di bala na diferente zonanan di e kapital di e pais.

Míles di haitiano a sali den oranan di djadumingu último riba kayanan di Port-Au-Prince i otro siudatnan di e pais despues di algun dia ku e Tribunal Superior di Kuenta a emití un informe ku ta involukrá e empresa di e mandatario den un supuesto maneho iregular di fondonan di Petrocaribe, via kua Venezuela ta suministrá petrolio na Haiti na preisnan sumamente abou.

Vários testigunan a señalá ku un miembro di polis a mata un persona, mandando esaki ku piedra, dilanti di e residensia di e presidente di Repúblika i ku agentenan di wardia presidensial a karga nan mes kontra un grupo di manifestante, lagando un morto i otro vários mas heridá.

Ademas, tabatin otro dos morto registrá, entre e partisipantenan di e manifestashon konvoká na Cabo Haitiano, na e parti nort di e pais.

Segun e bosero di e sektor demokrátiko i popular, Andre Michel, kua ta agrupá vários lider di oposishon i organisashonnan sosial, a indiká na medionan di komunikashon ku a kontá shete morto i mas di shen herido.

E gobièrnu di e pais ainda no a pronunsiá niun palabra relashoná ku loke a sosodé, pero e direktor di outoridatnan polisial nashonal di e pais, a anunsiá ku e institushon a habri un investigashon relashoná ku e agente ku supuestamente a kita bida di un manifestante.

Dia 31 di mei último, Korte Superior di Hunta di Haiti a manda su informe final pa Parlamento. Esaki relashoná ku e investigashon ku a keda realisá relashoná ku supuesto aktonan di korupshon relashoná ku maneho di fondonan di programa Petrocaribe.

Segun detayenan konosí pa medionan di komunikashon rònt mundu, e presidente haitiano i kompania lo a risibí miónes di dòler pa ehekushon di vários proyektonan pero ku niun di esaki nan no a keda realisá.

Den e mesun teksto aki a revelá ku segun tur kos ta indiká, ta eksistí un ret di funshonarionan den gobièrnu haitiano ku ta gestioná e optenshon di kontraktnan pa amigu di eks presidente Michel Martelly, meskos ku e eks promé minister Laurent Lamonthe.

E reporte di korte Superior aki ta kalifiká e situashon di grave di forma ku vários gobièrnu a gasta mas di 2 mion di dòler di fondonan di Petrocaribe entre aña 2008 i 2016, mitar di e rekursonan generá pa e programa durante e periodo aki.

Haiti ta biba un krísis ekonómiko, polítiko i di seguridat profundo, kua kada bes ta mas grave pa e masivo i violento protestanan kua a inisiá for di dia 7 di febrüari último, mesun dia ku Moise a kumpli dos aña na mando.