Sòftbòl femenino Liga CSB/MCB 2019 ta sigui interesante

122
Akshon den wega di softbol femenino.
WILLEMSTAD—E kampionato di sòftbòl femenino a kontinuá ku diferente partido. Esakinan unda tabatin weganan ku tabata berdadero lucha pa yega na triunfo i otro nan ku mas fasilidat, unda sigur e resultadonan finalmente a resultá di ta hopi interesante.

 

Klase A

Vipers 10 – Souax 0

Pa loke ta e enkuentronan den e kategoria klase A, Vipers/Elite ta gana di Souax/Gill’s Sport ku skor di 10-0. Picher ganadó tabata Jaqueline Sophia i mihó na bate Lishandley Ursulita, kende a bai di 3-2 pa e ekipo ganadó.

 

Dream Team 9 – Sta Rosa Angels 5

Miéntras ku e ekipo di Dream Girls/Mangusa ta gana di Sta Rosa Angels/Vanddis, ku skor di 9-5. Picher ganadó a resultá Martha Mercelina i mihó na bate den kousa viktorioso tabata Fariella Nivilac-Liberia di 3-3.

 

Dòbel A

Sta Rosa Angels 10 – Pichingolo 5

Pa loke ta e kategoria AA, e kompetensia di sòftbòl femenino a konosé tambe algun wega, ku a finalisá ku entre otro Sta Rosa Angels/Vanddis, despues di anotá 7 kareda den nan último oportunidat pa bati, ta bin di atras pa asina gana di Pichingolo Kia/ Nissan ku skor di 10-5.

Pa Sta Rosa 10 kareda, 12 hit i 1 eror. Picher ganadó pa Sta Rosa Angels a resultá Leonella Elizabeth, kende a drenta di relevo. E mihó na bate a resultá Suheydi Faneyt, ku a bai di 3-2.

Pa Pichingolo 5 kareda, 8 hit i 4 eror. Picher pèrdèdó tabata Arnalda Margaritha i mihó na bate den kousa pèrdí, tabata Abigai Daal, bayendo di 2-2.

 

Souax 12 – Nos Tei 2

Seguidamente tabata e ekipo di Souax/Gil’s Sport, ku ta gana di Nos Tei/Curaçao Office Supply, ku skor di 12-2.

Pa Souax 12 kareda, 7 hit, unda nan a hunga sin kometé eror. Dayanara ‘Una’ Piternella a bai ku e viktoria, miéntras ku e mihó na bate tabata Rianthe Winklaar, ku 1 hit den 2 turno. Nos tei a anotá na 2 okashon, konektando 5 hit i a hasi 9 eror. Tafari Janga a sufri e derota i na bate a destaká Celeste Francisca, ku a bai di 1-1.

 

Eagles 7 – Nos Tei 2

Finalmente den wega ku tambe a mira akshon tabata Eagles/Softex, ku ta derotá Nos tei/Curaçao Office Supply, ku skor di 7-2. Pa Eagles 7 kareda, 5 hit i 3 eror. Picher ganadó a resultá Yetsely Helmijr i e mihó na bate tabata Yahaira Cornelis, kende a bai di 3-2.

Nos Tei a anotá na 2 okashon, konektando 4 hit i a hasi 3 eror. Picher pèrdèdó a resultá Angelica Vilchez i e mihó na bate tabata Tafari Janga, ku un hit den un turno na plato.

 

Kontinuashon

E kampionato ta kontinuá awor, djaweps próksimo, dia 13 yüni 2019, na momentu ku lo bai tin 2 wega programá pa mira akshon. Ámbos lo ta bálido pa e kategoria AA i lo hunga riba tereno di Sabana Ballpark. Mitar di 8 di anochi The Fighting Team ta sali kontra Souax i seguidamente den enkuentro programá pa inisiá mitar di 10 anochi, Nos Tei lo topa ku Sta Rosa Angels.