Torneo ABC den pinpòn na Kòrsou

66
Sala Irene Moreno.
WILLEMSTAD—Djabièrnè awó riba fecha 14 yüni 2019, sede di pinpòn, ku ta Sala Rekreo Irene Moreno na Muizenberg, lo ta esenario pa inisio di un torneo ABC.

Lo bira un torneo di pinpòn, entre partisipantenan di e 3 islanan hermana, Aruba, Boneiru i Kòrsou, den tantu e kategoria Senior komo Master, unda lo bai tin premionan gordo den kèsh.

Promé ku e torneo mes inisiá, pa 6’or atardi, lo inisiá ku un parti ofisial, kaminda Federashon Tènis di Mesa Kòrsou, lo tin un Speech & Toast, ku bishita di entre otro Konsulado Chines. Konsulado Chines a hasi un formidabel donashon na federashon, ku asina por a renobá su sala kompletu, ku nan tin pa ya 35 aña komo sede, ku instalashon di lus nobo, flur nobo i tur mesanan nobo. Na e okashon aki federashon ofishalmente lo yama e Konsulado danki.

Despues lo ranka sali ku e weganan, riba e djabièrnè aki mes, inisiando 8’or di anochi. E kompetensia lo sigui djasabra repartí di entre 11’or di mainta te ku mitar di 3 atardi i seguidamente di 6’or atardi, pa mitar di 9 anochi. Riba e fecha final, kos lo ranka sali 11’or di mainta, ku e diferente weganan final.

Un i tur ta kordialmente invitá pa bin mira nos mihó Senior- i Masternan den akshon, unda lo bai tin 58 wega durante di e 3 dianan aki.