Carlos Monk: Rapides di HOF ta mustra gravedat di e kaso

545
Willemstad,– Carlos Monk di Kòrsou di Nos Tur ta bisa ku nan a entregá e keho kontra señor Martina dia 3 di yüni último  11.15 mainta i ya pa 2’or nan a haña un karta di HOF. Monk ta bisa ku esaki ta mustra bo e gravedat di e kaso, kaminda un minister den funshon di forma premeditá a kometé un delito penal.

“E keho di nos ta di 5 pa 6 blachi kaminda nos a mustra ku na 2013 Steven Martina partisipá den e mesun kos, pero e tempu ei tokante di e basis verzekering. Pues el a tuma parti den e desishon siendo e tabatin akshon den e kompania di seguro”, asina Monk ta bisa.

E ta sigui splika ku e tempu ei niun hende no a reakshoná i tur e intachabelnan den parlamento i promé minister di e tempu ei no a reakshoná, pero awor si e wega a kaba, segun Carlos Monk.E ta bisa ku na momentu ku aseguradonan a entregá e petishon, señor Martina tabata na Fatum.Monk ta bisa ku mester kuminsá denunsiá e aktonan aki ku ta kosta pueblo masha hopi mion mes.

Monk ta sigui bisa ku pueblo su konsenshi a kuminsá lanta i tur hende ta di akuerdo ku e keho aki. E bisa ku pueblo ta sklama pa hustisia i esnan ku ta yamá pa hasi esaki no ta hasié, paso parlamentarionan di koalishon ta korumpí. Señor Carlos Monk ta bisa ku ta esaki ta loke ku nan partido por a hasi, paso si bo bai parlamento, ta 12-9 e kos ta sali kon ku bo hasi i pues Monk ta bisa ku nan ta obligá na bai mas aya.