Grupo arestá pa trafikashon di hende dilanti wes komisario

697
Willemstad—  E grupo ku a keda detené pa trafikashon di hende a keda presentá dilanti wes komisario na unda a alarga nan aresto ku mas dia.

Den oranan di anochi di djabièrnè 7 di yüni i mardugá di 8 di yüni 2019, e Divishon di Krímen Organisá di Kuerpo Polisial Kòrsou den koperashon ku Warda Kosta, Duana, KMar (Koninklijke Marechaussee) i R.S.T. a tene entradanan hudisial na 3 diferente lokalidat.

E akshonnan aki ku tabata den kuadro di un investigashon en konekshon ku trafikashon di hende a konsentrá prinsipalmente na dos bibienda i un establesimentu di HoReCa.

Durante di e entradanan hudisial a detené un hòmber i un dama ku tabata permanesé ilegal riba nos isla, ámbos di nashonalidat venezolano ku a keda será pendiente di nan deportashon.

Kuater (4) otro persona a keda detené relashoná ku e investigashon i a keda enkarselá, despues di a presentá nan dilanti di un fiskal ouksiliar.

Ta trata di e muhénan sospechoso:

* R.T.R.M. nase nan Repúblika Dominikana di 45 aña di edat;

* F.M.S. nase na Venezuela di 20 aña di edat

I e hòmbernan sospechoso:

*R.A.N. di 23 aña di edat;

* N.G.F.T. di 36 aña di edat, ámbos nase na Kòrsou.

Investigashon den e kaso aki ta kontinuá. Tur su detenshon a keda alarga ku ocho dia mas.