Lancha ku a sali for di Venezuela pa Kòrsou no a yega nunka

3744

Willemstad,– Den oranan di djadumingu mainta, habitantenan di La Vela Venezuela, no por a drumi debí na un supuesto desaparishon di un embarkashon tipo peñero ku a biaha di manera ilegal ku destino Kòrsou i ku te ainda no sa paradero di e embarkashon aki i tampoko e kantidat di persona ku ta na bordo. Na Venezuela ainda nan ta den espera di un anunsio ofisial di parti di e outoridatnan  konserní. Vários famia na Venezuela ta tristu i resando pa nan ser nan kerí.

Ta trata aki di hòmber i muhénan ku a sali nan pais pa buska un mihó bienestar pa nan famia i ta nan so sa i konosé nan nesesidatnan.

Vigilante a papia ku un famia di La vela Coro, i e a splika nos ku nan e momentunan aki ta resando i ta konfia ku tur kos lo Sali bon. E ta bisa ku mas tempu pasa, mas angustia e ta trese pa e famianan ku ta karga hopi fe ku nan ser nan kerí ta na bida.

Lokual ta ser bisa na Venezuela ta ku e lancha aki a sali rumbo pa Kòrsou ku un kargamentu di droga i pa evitá ku esnan abordo lo papia, lo mester a eliminá nan. Pero tambe tin famianan aya na Venezuela ku ta insistí ku e lancha ta pèrdí i nan tin speransa ku nan famia ta na bida ketu bai.