Rochaline”Diva Roos”Reenis ta djòin e famia di Magic FM 96.5 Aruba 

128
Su soño a bira realidat.

WILLEMSTAD,—-Tabata ayera den oranan di mainta, den e programa ‘Bon dia Aruba’, ku Erin Croes, kende ta presentadó i alabes direktora di e prestigioso Radio na nos hermana isla Aruba, Magic FM ku frekuensia 96.5, a sostené un entrevista ku Rochaline “Diva Roos” Reenis i tambe su tata Orlando ‘Broertje’ Reenis.

E entrevista primeramente tabata basá riba desaroyonan di “Diva Roos” di e manera ku el a bin ta move den farándula tantu ku su programa ‘Live Broadcast “Diva Roos” On Air’, komo tambe su informashonnan farandulero riba su página di Facebook.

Tambe a toka e parti kon “Diva Roos” ta biba su bida apesar di tin un limitashon físiko i ta den un ròlstoel, pero ku nunka nada a strob’é di gosa di bida i bringa pa su soñonan. Netamente ora a trese e parti di soño dilanti, tabata e momentu ku Erin Croes a bisa oyentenan i “Diva Roos” ku e tin un sorpresa.

Tabata aki ku Erin a hasi anunsio ofisial ku “Diva Roos” lo pasa pa forma parti di e famia di Magic FM ku su propio programa. Mirando ku ta siman di selebrashon dia di tata, e lokutora, a pone atenshon un ratu tambe na Rochaline su tata, kende a wòrdu konsiderá un tata ehemplar i perfekto, mirando ku ta esun, huntu ku demas famia, ku ta yuda su yu mayó hasi su soñonan realidat. Tur hende ku konosé, i a bin ta sigui “Diva Roos”, sa ku esaki tabata su deseo for di chikí i bin ta bringa asina duru pa logra esaki i nunka a entregá i awor lo bai ta na Radio Magic 96.5 FM, unda Erin Croes a hasi su soño realidat.