Rumor fuerte ku Ike jesurun ta rumbo pa “Rei nan di kaya”

377
Awe su dia lo bai ta hopi drùk.

WILLEMSTAD,—-Moveshon nan ta sigui tuma lugá den nos farándula lokal. Di informashon ku a drenta na mesa di redakshon di ‘E Mulina’, ta bisa ku e legendario músiko kantante kompositor areglista Ike Jesurun lo ta rumbo pa agrupashon musikal “Reinan di kaya”.

Te kaminda ku nos ta na altura di dje ta ku Ike Jesurun ta forma parti di e banda den ámbito di Kòmbèk ku ta “Tan Tan”, pero nos a buska informashon ku tin un kambio den esaki. Mes ora ‘E Mulina’, a drenta den kontakto ku Ike pa asina nos tende kiko tin di bèrdat ku e no ta move mas ku “Tan Tan” i ku e ta rumbo pa e banda nobo ku ta “Reinan di kaya”.

Manera ku Ike a kue su telefon ‘E Mulina’, a bisé ku, nos tin informashon ku mañan lo bo bai tin un dia hopi drùk, kaminda ku lo bo bai tin dos reunion tras di otro. E la bisa nos ‘Kon bo ke men’. ‘E Mulina’, a bisa Ike ku mañan bo tin un reunion ku Richardson, i esaki ta bai rondó di agrupashon musikal “Reinan di kaya”. I despues bo tin un reunion mas i esaki ta ku Toto Gererd ku ta na kabes di e banda “Tan Ten”.

Mester bisa ku Ike Jesurun a kuminsá hari sin ke stòp, mas aleu ‘E Mulina’, tin informashon ku asta Ike ta trahando un piesa nobo pa agrupashon musikal “Reinan di kaya”, asta nos sa ta kua kantante ta bai kanta e piesa nobo en kuestion, i tambe nos tin e titulo di e piesa. Tambe ‘E Mulina’, a drenta den kontakto ku Toto Gerard, pero sin resultado deseá. ‘E Mulina’, sin duda ta bai sigui e moveshon aki ku wowo nan di falki.