Kenji Gorre na lugá di Gervane Kastaneer pa ‘Kopa di Oro’

190
Kenji Gorre.
WILLEMSTAD—Nos selekshon di futbòl, dirigí pa tékniko Remko Bicentini, ta konta ku un kambio, ku mira riba weganan di Kopa di Oro 2019. Esaki despues ku siman pasá nos ekipo nashonal a hunga na Tailandia den King’s Cup.

Na e okashon ei, nos ekipo a konta ku 23 hungadó i awor lo sali awe tambe ku 23 hungadó, pero unda tin un kambio. Un ke otro debí na leshon, ku a hasi ku Bicentini a opta pa e kambio.

Esaki unda ku e futbolista Gervane Kastaneer, kende tin un leshon na su bèl di pia drechi, ta pone ku lo e no por ta den akshon próksimamente, unda ku for di Tailandia e tabata den problema pa mira akshon. Mirando ku e mester di sosiegu i tratamentu, a opta pa laga Kastaneer keda kas, unda a remplas’é ku Kenji Gorre.

Ta trata aki di un futbolista di 24 aña di edat, kende na luna di sèptèmber benidero lo kumpli 25. Na aña 2016, Gorre tabata ku nos selekshon nashonal unda e la hunga den e wega amistoso na Hulanda kontra Sparta. Seguidamente e la opta pa tog wanta un ratu i awor tòg a yega na e desishon pa djòin nos ekipo. Esaki despues ku tambe e tabatin mas opshon.

E futbolista, atakante aki, su mama ta oriundo di nos isla. Ta trata di mucha ku a pasa den ekiponan hubenil di e organisashonnan di entre otro Manchester City, Manchester United i tambe Swansea City na Inglatera.

Na aña 2015/2016 e la hunga na Hulanda ku ADO Den Haag komo hungadó fiá i seguidamente tambe komo hungadó di hur ku Northampton Town, promé di a djòin e ekipo di Nacional na 2018. Miéntras tantu e ta hungando atrobe komo hungadó di hur, mirando akshon pa e ekipo di Estoril, den LigaPro di futbòl  na Portugal.

Pues un hungadó sigur di nivel, kual lo por ta un bon remplasante pa Kastaneer, den nos ekipo.