Zona ekonomiko di Kòrsou ta risibí promé grupo di kumpradó kubano ku ta hasi uso di tapeit kòrá ekstendé

364
Willemstad-   Zona Ekonómiko di Kòrsou resientemente a risibí e promé grupo di kumpradónan for di Cuba, ku a bin Kòrsou hasiendo uso di e tapeit kòrá ekstendé pa bin kumprá den nos zona ekonómiko.

Esaki ta e grupo promé di loke mester bira un fluho regular di kumpradónan for di Cuba ku lo bishitá nos zona ekonómiko pa hasi kompra pa komersialisá e merkansianan na nan pais.

E logro aki ta danki na esfuerso grandi ku Curinde, huntu ku su partnernan, ta hasi pa logra hala interes di Kubanonan pa bin hasi kompra den nos zona ekonómiko i fasilitá e proseso pa haña visa i konekshon  pa Kòrsou.  Curinde ya ta spera no ménos ku tres grupo mas di kumpradónan ku lo bishitá Kòrsou den e próksimo 2  lunanan danki na un akuerdo di koperashon ku e operadó di tur na Cuba Moralmeli.

Cuba ta un merkado ku hopi potensial pa nos zona ekonómiko, sigur enbista ku e situashon ta kambiando na Cuba. E zona liber di Panamá tabata un destinashon faborito di  kumpradónan for di Cuba i kaminda den 2017 nan a hasi no ménos ku US$ 308 mion na kompra.  Banda di Panamá e kumpradó for di Cuba su destinashon faborito ta Mexico, Perú i Haiti.  Kòrsou aki por bira un destinashon interesante pa e kumpradó for di Cuba debí na nos posibilidat di brinda surtimentu amplio di kalidat na preis rasonabel kombiná ku e proksimidat i ekspektativa di risibí mihó servisio ku na Panamá.  Sinembargo e durashon i proseso kompliká pa a haña un visa, kombiná ku falta di konekshon aéreo direkto tabata forma opstákulonan serio pa Kòrsou haña mas kumpradó for di Cuba.  Prueba di esaki ta ku den e último 10 añanan únikamente 2.500 kumpradó for di Cuba a bishitá nos zonanan ekonómiko.

Resientemente a drenta na vigor e asina yamá Caribbean Carpet Visa Facility ku ta hasi posibel pa entidatnan den reino  apliká pa duna prioridat na p.e. un kumpradó  un asina yamá Visana visa  di un forma aselerá.  E visa aki ta duna e bishitante tambe posibilidat di entrada múltiple pa asina e hasi mas bishita usando e mesun visa.  E entidat ku ta invitá, den e kaso aki Curinde,  ta para garantia miéntras ku tur otro rekisito pa bini na remarke pa haña un visa ta keda aplikabel.  Ku e visa aki ta fasilitá biahenan pa hasi komersio enormemente. E apertura aki ta forma parti di esfuersonan realisá pa Gobièrnu di Kòrsou pa krea un tapeit kòrá enbes di teip kòrá pa hasi negoshi na Kòrsou komo parti di strategia di kresementu di Kòrsou.  Curinde, den e kaso aki, ta fasilitá e petishon pa e visa dor di komersiantenan den zonanan ekonómiko di Kòrsou ku ke invita bishitantenan pa bin hasi kompra den nos zona ekonómiko.