Kòrsou ketu bai buskando promé gol den ‘Kopa di Oro’

313
E ekipo ku a inisiá kontra El Salvador.
WILLEMSTAD—Despues ku den nos debut den Kopa di Oro, Kòrsou a pèrdè 3 wega ku skor di 2-0, ayera nos ta bolbe keda sin yega na anotashon.

Un ke otro den nos promé partido di Kopa di Oro 2019, unda nos selekshon nashonal dirigí pa tékniko Remko Bicentini, a hunga nos promé wega di grupo C, na Jamaica.

Esaki ora ku Kòrsou a topa ku e selekshon nashonal di El Salvador. Tabata wega ku a hunga den Independence Park na Kingston Jamaica i a wòrdu dirigí pa rèfri Walter Lopez Castellanos for di Guatemala.

Durante di e parti inisial di e partido, Kòrsou a duna un futbòl aseptabel i inkluso tabata forma algun atake i a logra bira peligroso na algun okashon.

Sinembargo ya na momentu ku un i tur tabata wardando riba e pitaso pa sosiegu ta bin un pase entre dos den nos defensa, unda ku kapitan ‘Cuco’ Martina no ta logra pa interseptá esaki, kual ta yega serka Nelson Bonilla, kende ku un bon tiru leu for di alkanse di kiper Room, ta duna su ekipo bentaha, ku gol ku a resultá tambe e úniko di e enkuentro i esun viktorioso pa El Salvador.

Den e parti komplementario si, kosnan a bai otro, unda ku e ekipo ganadó, tabata esun ku a dominá i komandá.

Danki na algun bunita salbashon di Room durante di e wega, ku esaki a bin finalisá 1-0 so.

E wega aki a konosé 4 karchi hel di kual unu pa e ekipo ganadó, ku a bai pa e anotadó, pa motibu di un infrakshon kontra Shermaine Martina. Miéntras ku e último aki, huntu ku Jurich Carolina i Gino van Kessel tabata esnan ku a risibí karchi hel pa Kòrsou.

Kòrsou ayera a kuminsá ku Eloy Room den gol. Den defensa Jurien Gaari, Darryl Lachman, kapitan ‘Cuco’ Martina i Jurch Carolina.

Komo e mediokampsitanan kontroladó a inisiá Shermaine Martina i Leandro Bacuna. Miéntras ku nan dilanti a kuminsá Michael Maria i na banda Gevaro Nepomuceno i Elson ‘Sontje’ Hooi i den punta Charlison Benschop.

Tékniko Bicenitini a hasi 3 kambio, E promé tabata na di 57 minüt, ora ku Gino van Kessel a remplasá Michael Maria. 4 minüt despues Ayrton Statie ta drenta pa Shermaine Martina, kende a bandoná tereno di wega leshoná i faltando 7 minüt pa final, tabata Jafar Arias ku ta bai den tereno, na lugá di Jurich Carolina.

Nos ekipo nashonal lo bolbe mira akshon djabièrnè awor. Esaki den stadion Compass na Houston Merka, ora ku nos enfrentá e ekipo nashonal for di Hondúras, den nos segundo i penúltimo wega bálido pa Grupo C di ‘Gold Cup 2019’. Finalmente otro siman djamars, Kòrsou lo topa Jamaica na Los Angeles.