Michael Arvelo enkargá ku arbitrahe den Panamerikano di Pool

185
Michael Arvelo.
WILLEMSTAD—Resientemente Michael Arvelo, árbitro internashonal di biar, a risibí notifikashon ku e la keda asigná pa dirigí e kampionato Panamerikano di pool.

Arbitrahe kompleto ta na su enkargo i tambe e lo asistí komo direktor deportivo.

Esaki ta bai bira e di kuater evento grandi internashonal, ku ta bai kai kompleto bou di su enkargo.

E aña aki ‘Confederacion Panamericana de Billar’, den koperashon ku ‘Federacion Peruana de Billar’, lo organisá e evento anual aki. Un ke otro lo tuma lugá na Lima, Perú.

Tur kos lo tuma lugá na e sentro deportivo Club La Union, den siudat kapital.

For di dia 16 ougùstùs benidero, lo inisiá ku weganan klasifikatorio i e promé evento ofisial lo tuma lugá entre 19 pa 22, kual ta e disiplina di Bola 8.

Seguidamente entre dia 23 pa 26 di e mesun luna tambe, lo tin Bola 10. Miéntras ku ta tèrminá ku di 27 pa 30, ku Bola 9.

Lo hunga den tur tres kategoria, kual nan ta maskulino mayor, femenino mayor i hubenil tantu maskulino, komo tambe femenino.

Despues di e kampionato Panamerikano, Michael Arvelo ta keda un siman mas pa e por duna kurso di arbitrahe na 10 rèfri di biar di e federashon di Perú.