Den ménos ku sinku dia Dolce Banda ta bai pone dos piesa nobo riba merkado

228
8 aña largu e ta na kabes di su banda Dolce Banda. 
WILLEMSTAD,—-For di algun dia tras di lomba ‘E Mulina’, a bisa ku promé ku fin di luna aki, masha hopi piesa nobo ta bai kuminsá zona na diferente radio emisora lokal. I esaki ta loke ku ta bai pasa tambe. T’asina ku ayera nos a haña informashon ku e formashon musikal Dolce Banda den apénas sinku dia ta bai pone 2 piesa nobo riba merkado.

Pa loke ta trata e promé piesa ku e banda ta bai manda kaya su titulo ta “Bon Dushi”, esaki ta keda kanta pa e kantante Clarck “Yuyu”Zlam, esaki ta un Komposishon di  Clifford Martina i Lucendy Girigorie, miéntras ku e areglo ta den man di Clifford Martina.

Anto djaluna awor e di dos piesa nobo ta bai kuminsá zona na diferente radio emisora lokal, esaki su titulo ta “Sekuestrá” i e ta keda interpretá pa e kantante Clifford “Clepo” Martina, ta trata aki di un komposishon di Quincy “Biggie”Comenencia i “Clepo” mes tin e areglo den su man.

Mester bisa aserka ku dia promé di yüli Dolce Banda ta hasi 8 aña den nos farándula, pero djaweps awor nan ta bai selebrá esaki den grandi ku tur nan fanátiko nan den Emporio. Pa ku esaki lo bai tei komo artista invitá Henry B i Chony Nahr i komo chèri riba e bolo tambe lo bai tei e super popular kantante “DjuDju-V”. Esaki ta nifika ku djaweps awor ta den Emporio e kos ta bai sinta, kaminda ku Dolce Banda ta bai selebrá nan di 8 aña aktivo den nos farándula.