44 morto registrá den aksidente di bùs na India

107
Situashon den kua e bùs a keda despues di e aksidente.

NEW DELHI – Un total di 44 persona a pèrdè nan bida i otro 17 mas a resultá heridá na momentu ku un bùs den kua nan tabata biaha, a kai for di un baranka pa motibunan ainda deskonosí den e region di Himachal Pradesh, na nort di India.

E aksidente aki a keda registrá na alrededor di 15.45. Na e momentu aki tabatin un total di 60 persona biahando abordo di e vehíkulo algun di nan na e parti ariba, na momentu ku pa un motibu òf otro el a bai den bashí for di baranka.

Te ainda ta deskonosé e kousanan eksakto di e aksidente, pero si a indiká ku ya a inisiá ku e investigashonnan nesesario.

Mas aleu a indiká ku e situashon awor ta bou di kontrol, esnan heridá a keda trasladá pa sentronan médiko i ta risibí e tratamentunan nesesario.

Aksidentenan di tráfiko na India ta frekuentá pa kousa di mal estado den e via nan, mal kondishon di algun vehíkulo i masha poko rèspèt ku tin na e pais pa regla i normanan di sirkulashon.

Inkluso a indiká, ku segun e último datonan disponibel pa Ministerio indio di Transporte, un total di 147. 913 persona a pèrdè nan bida den aksidentenan di tráfiko na e pais. Esaki durante aña 2017. Esaki ta nifiká un 1.9 porshento menor kompará ku e aña anterior