Kaso di muhé tirá i asesiná dilanti su yu chikí ta konmoshoná Colombia

135
Víktima ku a keda asesiná dilanti di su yu hòmber menor di edat.

BOGOTA – E asesinato di un muhé di 36 aña di edat, kua algun organisashon ta definí komo un lider sosial, dilanti di su yu hòmber di 4 aña, tin Colombia kompletamente konmoshoná mirando krueldat di e echo. E echo a keda registrá na Tierralta, na e departamento karibense di Córdoba.

E víktima, identifiká komo Maria del Pilar Hurtado Montaño, a keda asesiná dilanti su yu, den un bario humilde, aparentemente pa deskonosínan ku despues a hui for di e sitio riba un bròmer.

E momentunan posterior di e krímen a keda registrá den un video ku ta sirkulando riba retnan sosial i den kua gritu i yoramentu di yu hòmber di e víktima, a kibra kurason di henter e pais.

E visepresidente kolombiano, Marta Lucia Ramirez, a indiká via di su kuenta di Twitter, ku e asesinato aki ta konmové i tambe indign’é kon a laga un yu den doló atras.

Esaki ademas a agregá ku personalmente lo investigá si outoridatnan tabata na altura di algun tipo di menasa i ku lo pone tur medio pa asina klara i sera e kaso aki.

E homisidio aki ta keda produsí mei mei di un ola di asesinato di lidernan sosial ku ta kousa un alarma na e pais.

E sifranan ta varia segun e kuentanan di diferente organisashon, i miéntras ONG ta kalkulá ku entre aña 2016 i 2018, un total di 341 sosialista a keda asesiná. Miéntras ku Defensoria di Pueblo ta kalkulá 431 den e mesun periodo aki.