Mas di 1000 venezolano ta hui pa Colombia pa rumor di konfrontashonnan armá

257
Venezolanonan ku a kue kaminda pa Colombia den fin di siman.

BOGOTA – Un total di mil venezolano a yega e fin di siman aki na e frontera di e munisipio kolombiano di Puerto Santander alarmá pa rumornan di un posibel konfrontashon armá i supuesto menasanan na nan pais, di parti ELN.

Tabata den e anochi di dia 22 último, ku un biaha mas frontera tabata será di parti Venezuela i vários famia ku menornan di edat a bai intentá di krusa di forma iregular, den nan intento di yega Puerto Santander.

E ekstranheronan, di Boca de Grita, a sigurá outoridatnan kolombiano ku nan yegada via di e brùg La Union, ta debí na rumornan fuerte di un konfrontashon armá na e teritorio venezolano.

Segun Migrashon Colombia, e mayoria di e venezolanonan a pasa anochi na bibienda di famia i konosí nan , pero serka di 200, entre nan 77 menor di edat, mester a keda ubiká den kampamentunan improvisá instalá na Puerto Santander.

Algun inmigrante a sigurá ku na Boca de Grita, a distribuí un pamflèt ku supuesto menasanan di guerilla kolombiano Ehérsito di Liberashon Nashonal, ELN, motibu pa kua nan a disidí di hui.

Aktualmente, Colombia tin mas di 1,3 mion di venezolano riba su suela, siguí pa Peru ku 768 mil, Chile ku 288 mil, Ecuador ku 263 mil, Argentina ku 130 mil i Brasil ku 168 mil.

Den e aña aki, a presentá vários interkambio di tiru na frontera di Venezuela ku Colombia, entre miembro di geng nan kriminal. E último di e echonan aki a tuma lugá dia 18 di yüni último na Boca de Grita, na momentu ku un tiroteo entre Los Rastrojos i Los Urabenos a laga saldo di 12 morto.

Segun outoridatnan, e konfrontashonnan aki a tuma lugá despues di un disputa pa kontrolá e teritorio i rutanan di narkotráfiko i kontrabanda den e zona.