Duda: van Kwartel a deklará ku no tabatin nada di korupshon di su parti sino trampa ku a wòrdu harmá p'e hòmber Colas Bos.
Punda– Èks direktor di Refineria di Kòrsou, Roderick van Kwartel tin prueba ku èks intermediario di Count, Colas Bos a sugerí pa nan regalá PDVSA, un barku! Esaki a tuma lugá durante e periodo ku Bos tabatin kontakto ku RdK pa yega na un sosio stratégiko.

Segun van Kwartel, kende na e momentonan aki ta den aresto preventivo, e tin prueba ku riba 9 di ougùstùs 2018, den un whatsapp, Bos a ekspresá su mes pa nan regalá PDVSA un barku. Esaki tabata unu di e rason nan ku van Kwartel nunka a konfia Bos, kende al final tabata esun kende a bai bati bèl serka Eugene Rhuggenaath. Gilbert Cijntje, kende tambe ta detené, a deklará tambe den korte sivil, ku tabata Colas Bos kende tabata esun ku a stashoná dilanti su kas pa promé biaha. Segun Cijntje nunka promé e no a konosé Bos. Segun van Kwartel a deklará, riba 12 di yüli 2018, durante un fiesta na kas di Gilbert Cijntje, huntu ku Ashley Isidora, nan a kumbiní pa inisiá ehekushon di un plan pa kuestioná Colas Bos. Van Kwartel a bisa ku Cijntje tabata esun kende a invit’é pa bini su kas pasobra su yu tabatin fiesta di su kumpli aña. Van Kwartel den su deklarashon nan a duna di konosé ku nan a reuní entre 4 pa 5 biaha ku Bos. E mes no tabata presente na tur reunion, pero e idea tabata pa traha un trampa p’e. I segun van Kwartel, Bos a kai den e trampa tambe. Si bai tras di lokual van Kwartel a deklará, na finalnan di ougùstùs, a drenta un e mail di e direktor finansiero di Count Energy Trading. Count tabata e kompania enkargá pa yuda yega na un sosio stratégiko pa Refineria Isla i Bos tabata traha pa nan. Segun van Kwartel riba e mail korespondiente na fin di ougùstùs, manera e mail a drenta, Colas Bos, via un mail personal i no esun di Count, den apénas 10 minüt despues, ta deskribí e ophetivonan di un kompania nobo ku mester wòrdu lantá den kuadro di e proyekto.

Pa van Kwartel tur kos a kaba ya ku e tabata sufisiente na altura ku Bos no tabata konfiabel pa su persona i riba 26 i 27 di ougùstùs e la splika Cijntje, Kinburn i Isidora pa stòp e operashon di undercover ku nan a imponé riba Bos. Pero Bos ta deklará otro. Segun e deklarashonnan di Bos, e kontaktonan a sigui pasobra Ashley Isidora kende tabata fungi komo konsultent, riba 28 di ougùstùs 2018, a sugerí na Bos pa depositá un suma di 5 mion dòler riba un escrow account. Tin prueba ku Isidora a apuntá esaki den un buki di Bos. Momento a konfrontá van Kwartel ku e lokual Isidora a pone riba papel di e 5 mion dòler, van Kwartel a bisa ku esei a tuma lugá pafó di su konosementu.