Bailadó nan di Breakdance di dékada 80 ta bai haña homenahe den Roi na Koraalspecht

336
E ta na kabes di e gran evento di Breakdance 27 di sèptèmber den Roi di Koraalspecht.

WILLEMSTAD,—-Djabièrnè 27 di sèptèmber lo bai bira un dia hopi grandi den farándula di Kòrsou. T’asina ku riba e dia en kuestion e organisashon di “JKP”, lo bai duna homenahe na algun bailadó di Breakdance ku tabata hopi popular den dékada 80 i ku a sa di hasi hopi furor den Roi di Koraalspecht.

T’asina ku den dékada 80 pa ta eksakto di 1980 pa 1985, riba tur djabièrnè anochi tabatin bailamentu di Breakdance den e famoso Roi den Koraalspecht. Mester bisa ku práktikamente tur e mihó bailadó nan di e tempu ei a baila den Roi di Koraalspecht, si dado kaso abo komo bailadó di e tempu ei no a baila den e bario ariba menshoná, libramente mester bisa ku bo no tabata konta den e mihó nan di tur tempu.

‘E Mulina’, a keda pone na altura ku riba e dia en kuestion, e veterano nan di dékada 80 lo no subi riba e pista di baile, paso e generashon di e momentu aki ta bai regalá esun nan ku ta presente un bunita show hinka den otro, i asina laga e bailadó nan di dékada 80 mira kon e kos ta awendia.

Pero esaki no ta kita afó ku bo por bai haña ku algun di e bailadó nan di dékada 80 por bin aden i mustra e hóben nan di awendia kon e kos nan tabata den dékada 80.Mester bisa ku práktikamente tur e bailadó nan di dékada 80 ta riba 50 aña plùs. Pero esaki no ta kita ku nan ta bai baha kabes pa e generashon nobo.